Romans 6
Гуна ичюн олю, амма Месихнен бирликте тири
1Айса не айтайыкъ? Эйилик чокълашсын деп, гуна япа берейикми? 2 aАсыл ёкъ! Олю адам бир даа гуна япамагъаны киби, биз де гунагъа олю киби олып, насыл этип, даа гуна япа береджекмиз? 3Сизлер бильмейсизми? Сувгъа батырылып чыкъкъанларнынъ эписи Иса Месихке иман эткен джемиетнинъ бир къысмы олып, Онен берабер ольген киби олдылар. 4 bБиз сувгъа батырылып, олюлерден тирильген Месих киби олып, Месихнен берабер ольген киби оламыз ве тирилип, янъыдан яшап башлаймыз. 5 cЭгер биз Месихнен берабер ольген киби олсакъ, Онен берабер тириледжекмиз. 6 dБиз билемиз ки, гуна япмагъа истеген беденимиз ёкъ олсун ве биз энди гунагъа къул олмайыкъ деп, Месихнен берабер бизим эски джанымыз хачкъа мыхланды. 7 eОльген адам гуна япмакътан азат олды. 8 fЭгер биз Месихнен берабер ольген олсакъ, Онен берабер яшайджагъымызгъа инанамыз 9 gве билемиз ки, Месих олюлерден тирилип, бир даа ольмейджек ве бир даа олюмнинъ къувети тюбюнде олмайджакъ. 10 hО, ольди, бир кере гуна ичюн ольди. Тирилип исе, Алла ичюн яшай. 11Сизлер де озьлеринъизни гунагъа олю сайынъыз, лякин Иса Месихнен берабер тири олып, Алла ичюн яшанъыз. 12 iБойлеликнен, гунагъа сизинъ оледжек беденлеринъизге падишалыкъ япмагъа ёл берменъиз ве беден истеклерине бойсунманъыз. 13 jБеденлеринъизнинъ ич бир мучесинен инсафсыз иш япманъыз, гунагъа берильменъиз. Аксине, олю олып, лякин тирильген адамлар киби, Алланынъ огюнде яшанъыз ве беденлеринъизнинъ мучелеринен инсафлы ишлер япып, Аллагъа берилинъиз. 14Гуна сизге бир даа падишалыкъ этмез. Къанунгъа коре дегиль, Алланынъ эйилигине коре яшайсынъыз.Энди гунанынъ къулу дегильсиз
15Айса не япайыкъ? Къанунгъа коре дегиль, Алланынъ эйилигине коре яшап, гуна япайыкъмы? Асыл ёкъ! 16 kСизлер бильмейсизми? Озьлеринъизни къул киби бир кимнинъ къолуна берсенъиз, о адамгъа бойсунгъан къул оласынъыз. Гунанынъ къулу олсанъыз, оледжексинъиз. Алланы динълеген къул олсанъыз, инсафлы сайыладжакъсынъыз. 17Сизлер гунанынъ къуллары эдинъиз, лякин Аллагъа шукюр, сизге берильген огретювни джан-юректен динълединъиз, 18 lгунадан къуртулып, инсафлыкънынъ къуллары олдынъыз. 19Акъылларынъыз зайыф олгъаны ичюн, адамджа лаф этем. Бир вакъытлары сиз писликнинъ ве ахлякъсызлыкънынъ къуллары олып, къанунсызлыкъ эте эдинъиз. Энди исе инсафлыкънынъ къулу олып, азиз ишлер япынъыз. 20Гунанынъ къулу олгъанынъызда, инсафлыкънынъ къулу оламай эдинъиз. 21Лякин о вакъыт не ишлер япа эдинъиз? Шимди олардан озюнъиз утанасыз. О ишлернинъ сонъу – олюмдир. 22 mАмма шимди гунадан къуртулып ве Алланынъ къуллары олып, азизлик кетирген ишлерни япып башладынъыз. Буларнынъ сонъу – эбедий омюрдир. 23 nГуна япып, тек олюм къазанмакъ мумкюн. Алла берген бахшыш исе – Раббимиз Иса Месихнен берабер эбедий омюрдир.
Copyright information for
CrhCTB