Rut 2 | CrhCTB | STEP | Ноомийнинъ акъайы тарафындан, Элимелекнинъ союндан буюк бир догъмушы бар эди. Онынъ ады Боаз эди.

b Збр 128.8

‏ Ruth 2

Рут Боазнынъ тарласында

1 ^aНоомийнинъ акъайы тарафындан, Элимелекнинъ союндан буюк бир догъмушы бар эди. Онынъ ады Боаз эди. 2 Моавлы Рут Ноомийге:

– Тарлагъа барайым ве кимнинъ козюнде мерамет тапсам, онынъ артындан башакъларны джыяйым, – деди.

– Бар, къызым, – деди онъа Ноомий.

3 Рут барды ве тарлаларда оракъчыларнынъ артындан башакъ джыймагъа башлады. Бойле олды ки, о тарланынъ къысмы Элимелекнинъ союндан олгъан Боазнынъки эди.

4 ^bБу арада Вифлеемден кельген Боаз оракъчыларгъа:

– РАББИ къолай кетирсин! – деди.

Олар да онъа:

– РАББИ сенден разы олсун, – деп джевап къайтардылар.

5 Сонъ Боаз оракъчыларнынъ башында олгъан яш хызметчисинден:

– Бу яш къадын кимнинъкидир? – деп сорады.

Оракъчыларнынъ башында олгъан яш хызметчи джевап берип:

6 – Бу яш къадын – моавлыдыр. О, Ноомийнен берабер Моав чёллеринден кельди. 7 «Мумкюн олса, оракъчыларнынъ артындан кетип, деметлернинъ арасындан къалгъаныны джыйып топлайым», – деди. Сабадан берли шимдиге къадар тарлада чалыша, тек эвинде бираз раатланды, – деди.

8 Боаз Руткъа:

– Динъле, къызым. Башакъ джыймагъа башкъа тарлагъа барма, мындан кетме. Мында, меним хызметчи къызларымнен берабер къал. 9 Козюнъ оракъчылар оргъан тарлада олсун, артларындан кет. Хызметчилериме санъа илишмемеге буюрдым. Сувсагъанынъда, хызметчилерим алгъан савутлардан сен де барып, ал да ич, – деди.

10 ^cРут эгилип, бетинен ерге тийди ве ондан:

– Не япып козюнъде мерамет таптым да, сен, мен ябанджы олсам да, манъа яхшы бакъасынъ? – деп сорады.

11 Боаз джевап берип:

– Акъайынъ ольген сонъ къайнананъ ичюн бутюн япкъанларынъ акъкъында хаберим бар. Ананъны, бабанъны, ветанынъны ташлап, не тюневин, не де обирскунь бильмеген халкънынъ арасына кельдинъ. 12 ^dБу япкъанларынъ ичюн санъа РАББИден къайтсын, ве Исраильнинъ Алласы РАББИден санъа бол мукяфат олсун, чюнки сен Онынъ къанатлары тюбюнде сакъланмакъ ичюн кельгенсинъ! – деди.

13 ^e– Козюнъде мерамет къазанайым, эфендим! Хызметчи къызларынъа тенъ кельмесем де, сен меним гонълюмни алдынъ ве къулунънынъ юрегине яткъан гузель шейлерни айттынъ, – деди Рут.

14 – Уйлелик вакъты кельди, – деди онъа Боаз. – Мында кель, отьмек ал, экши шарапкъа батырып аша.

Рут оракъчыларнынъ янына отурды. Боаз онъа къавурылгъан богъдай данелерини узатты, о, ашап тойды, ве даа аш къалды. 15 ^fСонъ Рут башакълар джыймакъ ичюн турды, Боаз яш хызметчилерине:

– Деметлер арасында да башакъ джыйсын, джаныны агъыртманъыз. 16 Деметлерден башакъларны да айырып, ерге ташланъ да, джыйсын. Сакъын, оны сёгменъиз, – деп буюрды.

17 Бойледже, Рут акъшамгъадже тарлада башакъ джыйды. Джыйылгъанны чеккен сонъ, ярым чувал ^{▼▼Ярым чувал – къ. еуд. «бир эфа».} арпа чыкъты. 18 Буны алып, шеэрге кетти, къайнанасы онынъ не къадар джыйгъаныны корьди. Рут къойнундан аштан къалгъаныны чыкъарып къайнанасына берди.

19 Къайнанасы ондан:

– Сен бугунь къаерде башакъ джыйдынъ, къаерде чалыштынъ? – деп сорады. – Санъа о къадар ярдым эткен адамдан Алла разы олсун!

Рут къайнанасына кимде чалышкъаныны айтып берди ве:

– Мен бугунь чалышкъан адамнынъ ады Боаз, – деп къошты.

20 – РАББИ ондан разы олсун, чюнки о сагъларгъа да, олюлерге де мерамет косьтерди, – деди Ноомий келинине. Сонъ Ноомий даа къошты: – Бу адам бизим якъынымыз, бизим ичюн джевапкяр ^{▼▼Ольген догъмушынынъ къорантасыны мухтадж къалдырмагъан якъын сой. Эгер онынъ догъмушы бала-чагъасыз олип кетсе, энъ якъын сой (аркъа) онынъ тул апайына эвленмеге борджлу эди (Теврат: Текр 25.5-10 бакъ.). О заман оларнынъ биринджи догъгъан огълу ольген союнынъ огълу ве мирасчысы деп сайыла эди.} догъмушлардан биридир.

21 Моавлы Рут даа буны айтты:

– О манъа атта бойле деди: «Оракъ вакъты битмегендже, меним хызметчи къызларымнен къал».

22 – Къызым, сен онынъ хызметчи къызларынен юрсенъ ве башкъа тарлада кимсе санъа илишмесе, яхшы олур, – деди Ноомий озь келинине Руткъа.

23 Бойледже, Рут Боазнынъ хызметчи къызларынен къалды ве арпа ве богъдайнынъ оракъ вакъты битмегендже, башакъ джыйып юрди. О вакъыт къайнанасында яшай эди.