‏ Ruth 4

Боаз Руткъа эвлене

1 ^aБоаз шеэрнинъ къапусы янына барып отурды. Янындан о айткъан догъмушы кечкенде, онъа: «Кель мында, фелянча адам, бу ерге отур», – деди. Адам барып, онынъ янына отурды. 2Сонъ Боаз шеэр акъсакъалларындан он адам чагъырып, оларгъа:

– Сиз де келип, отурынъыз, – деди, ве олар отурдылар.

3Боаз догъмушкъа:

– Ноомий Моав чёллеринден къайтып, Элимелек агъамызнынъ тарласынынъ къысмыны сата. 4 ^bБуны санъа бильдиреджек ве буны айтаджакъ олдым: мында отургъанлар огюнде ве халкъымнынъ акъсакъаллары огюнде оны сатын ал. Аркъа олмагъа истесенъ, ол, олмагъа истемесенъ исе, манъа бильдир, ве мен билейим. Сенден гъайры аркъа олмагъа кимсенинъ акъкъы ёкъ. Сенден сонъ мен келем, – деди.

– Мен аркъа олурым, – деди о.

5 ^cБоаз:

– Ноомийнинъ тарласыны алгъанда, ольген адамнынъ ады озь топрагъында къалсын деп, сен ольгеннинъ апайы моавлы Рутнынъ пайыны да алмакъ керексинъ, – деди.

6Догъмуш:

– Онъа аркъа олмагъа имкяным ёкъ, ёкъса мен мирасымны бозаджагъым. Сен онынъ аркъасы ол. Мен исе онынъ аркъасы олып оламайым, – деди.

7 ^dЭвель Исраильде бойле адет бар эди: бир шейни сатын алгъанда я да бир шейни башкъа шейге денъиштиргенде, бу ишни тасдыкъламакъ ичюн, бири аякъкъапыны чыкъарып, башкъасына бере эди. Бу, Исраильде шаатлыкъ эди.

8Джевапкяр догъмуш Боазгъа:

– Сен озюнъ оны ал, – деп, аякъкъапыны чыкъарды.

9Сонъ Боаз акъсакъалларгъа ве бутюн халкъкъа:

– Бугунь сизлер шаатсынъыз: мен Ноомийден Элимелекнинъ, Килионнынъ ве Махлоннынъ бутюн мал-мулькюни сатын алам. 10 ^eЭм Махлоннынъ апайы моавлы Рутны да апай оларакъ алам. Бойлеликнен, ольгеннинъ ады озь топрагъында къаладжакъ, ве ольгеннинъ ады агъа-къардашларынынъ адлары арасындан ве шеэрден, онынъ еринден ёкъ олмайджакъ. Бугунь сиз бунъа шаатсынъыз, – деди.

11 ^fШеэр къапусы янында олгъан бутюн халкъ ве акъсакъаллар:

– Эбет, биз шаатмыз, – дедилер. – Сенинъ эвинъе кирген къадынны РАББИ Рахельге ве Леагъа ошатсын. Бу эки къадын Исраиль эвининъ темелини къойдылар. Эфратада зенгин ол ве Вифлеемде нам къазан. 12 ^gРАББИ бу яш апайнен санъа эвлят берсин, ве онынъ ярдымынен Сенинъ къорантанъ Тамар Ехудагъа догъгъан Перецнинъ къорантасы киби олсун.

Боаз ве онынъ эвлятлары

13 ^hБоаз Рутны озюне алды, ве о, онынъ апайы олды. Боаз Рутнен берабер апай-акъай олып ятты. РАББИ онъа агъыр аякълы олмагъа ёл берди, ве Рут огълан бала тапты.

14Апайлар да Ноомийге:

– РАББИге бинъ шукюр олсун! О, бугунь санъа мирасчы-къорчалайыджыны берди. Онынъ ады Исраильде намлы олсун! 15 ⁱО, сенинъ гонълюнъни алсын ве къартлыгъынъда таянчынъ олсун, чюнки оны сени севген ве еди огъулдан да дегерли олгъан келининъ тапты, – дедилер.

16Ноомий баланы къолуна алып, багърына басты ве оны бакъты.

17Къомшу къадынлар:

– Ноомийнинъ огълу олды, – деп, балагъа Овед деген ад къойдылар. Овед – Йишайнынъ бабасы, Йишай – Давутнынъ бабасы олды.

18 ^jПерецнинъ эвлятлары бойледир: Перец Хецроннынъ бабасы, 19Хецрон Рамнынъ бабасы, Рам Амминадавнынъ бабасы, 20 ^kАмминадав Нахшоннынъ бабасы, Нахшон Салмоннынъ бабасы, 21Салмон Боазнынъ бабасы, Боаз Оведнинъ бабасы, 22Овед Йишайнынъ бабасы, Йишай Давутнынъ бабасы олды.