‏ Song of Solomon 6

Къызлар:

1 ^a– Къадынларнынъ энъ гузели!
Къайда кетти севгилинъ?
Не якъкъа севгилинъ ёл алды?
Биз де оны сеннен берабер къыдырайыкъ!

Къыз:

2 ^b– Севгилим кетти багъчасына,
къокъулы отлар бостанына,
багъчада айванларны отлатмагъа,
занбакъларны топламагъа.
3 ^cМен – севгилимнинъки,
севгилим де – менимки.
Занбакълар арасында о, кейфлене ▼

▼Я да «Занбакълар арасында о, айванларыны бакъа».

.

Аджайип келин

Огълан:

4– Ярем, Тирца шеэри киби, сен гузельсинъ,
Ерусалим киби, дюльберсинъ,
байракълар тюбюнде бир орду киби, аджайипсинъ.
5 ^eКозьлеринъни менден чевир,
олар мени раатсызландыра!
6 ^fСачларынъ Гилад дагъындан тюшип кельген эчкилер киби, къара.
Тишлеринъ – къыркъылып ювунгъан беяз къойлар кибидир;
эр бирининъ чифти бар,
араларында да къысыр сою ёкъ.
7 ^gЗулюфлеринънинъ тюбюнден янакъларынъ –
санки нар парчасыдыр!
8Падишанынъ алтмыш апайы,
сексен джариеси,
эсабы олмагъан къызлары олса да,
9амма бир данедир меним гузель гогерджиним,
анасынынъ бирден-бир къызы,
догъургъан анасынынъ козь бебегидир.
Къызлар оны корип, онъа «бахтлы» дедилер,
падишанынъ апайлары ве джариелери оны макътадылар.

Къызлар:

10– Кимдир бу къыз?
Танъ киби бакъа о,
ай дайын дюльбер,
кунеш дайын темиз,
байракълар тюбюнде бир орду киби аджайип.

Къыз:

11 ^h– Джевизликке эндим,
ешиль вадийге бакъмагъа истедим.
Юзюм пытакълары ешердими?
Нарлар чечек ачтымы?
Насыл олды, бильмейим,
джаным мени халкъымнынъ асылзаделерине,
оларнынъ арабаларына алып кетирди.
12