Zec 1 | CrhCTB | STEP | Дарьявеш падишалыгъынынъ экинджи йылында, секизинджи айында РАББИ Иддонынъ торунына, яни Берекиянынъ огълуна, Зекерья пейгъамберге бойле деди:

‏ Zechariah 1

Рабби халкъны Озюне къайтмагъа чагъыра

1 ^aДарьявеш падишалыгъынынъ экинджи йылында, секизинджи айында РАББИ Иддонынъ торунына, яни Берекиянынъ огълуна, Зекерья пейгъамберге бойле деди:

2 – РАББИ деделеринъизге пек ачувланды. 3 ^bХалкъкъа бойле айт:

Бу – Ордулар РАББИсининъ сёзлери.

– Манъа къайтынъыз, – дей Ордуларнынъ РАББИси.

– Мен де сизге къайтарым, – дей Ордуларнынъ РАББИси. 4 ^c– Деделеринъиз киби олманъыз! Эвельки пейгъамберлер оларгъа бойле айта эдилер: «Ордуларнынъ РАББИси сизлерге: “Яман ёлларынъыздан ве яман ишлеринъизден вазгечинъиз”, – дей». Лякин олар динълемедилер ве Манъа къулакъ асмадылар, – дей РАББИ.

5 Къана, деделеринъиз къайдалар? Пейгъамберлер де эбедий яшармы? 6 ^dЛякин Мен къулларыма пейгъамберлерге айткъан сёзлерим ве буюргъан низамнамелерим деделеринъизнинъ яшайышларында беджерильди. О вакъыт олар Манъа тёвбенен къайтып: «Ордуларнынъ РАББИси бизни яшайыш ёлларымыз ичюн ве япкъан ишлеримиз ичюн джезалады», – дедилер.

Биринджи руя. Атлар

7 Дарьявеш падишалыгъынынъ экинджи йылында, 11-инджи айында (Шеват айында), 24-юнджи кунюнде РАББИ Иддонынъ торунына, яни Берекиянынъ огълуна, Зекерья пейгъамберге, Озь сёзлерини ёллады.

8 ^eГеджесинен корьгеним будыр: мына, сары аткъа минген адам вадийде, мирт тереклери арасында отура. Аркъасында исе сары, къаверенки ве беяз атлар бар эди.

9 – Эфендим, олар недир? – деп сорадым мен.

Меннен лаф эткен Мелек:

– Олар не олгъаныны санъа косьтереджегим, – деди.

10 Мирт тереклери арасында тургъан адам:

– РАББИ оларны ер юзюни юрип бакъмагъа ёллады, – деди.

11 Олар мирт тереклери арасында тургъан РАББИнинъ Мелегине бойле дедилер:

– Ер юзюни юрип бакътыкъ. Бутюн ер юзю раат ве тынчтыр.

12 ^fСонъ РАББИнинъ Мелеги:

– Ордуларнынъ РАББИси! Ерусалимге ве Ехуданынъ шеэрлерине къаршы ачувлангъанынъ етмиш йылдыр. Оларгъа не вакъыт шефкъатлы бакъаджакъсынъ? – деди.

13 О вакъыт меннен лаф эткен Мелекке РАББИ татлы ве мераметли сёзлернен джевап берди.

14 ^gМеннен лаф эткен Мелек бойле деди:

– Ордулар РАББИсининъ сёзлерини хабер эт: «Мен Ерусалим ве Сион ичюн пек къасеветлендим. 15 ^hТынч яшагъан халкъларгъа къаршы исе ачувым къайнай. Мен чокъ ачувланмагъанымда, олар яманлыкъкъа яманлыкъ къоштылар. 16 ⁱОнынъ ичюн РАББИ бойле дей: Ерусалимге мераметнен къайтаджагъым. Анда Меним Эвим къуруладжакъ, – дей Ордуларнынъ РАББИси. – Ерусалим гъайрыдан къуруладжакъ ^{▼▼Къ. еуд. сёзю-сёзюне «Ерусалимде бойдан-бой ольчев йипи чекиледжек» демектир.}». 17 ^kДаа Ордуларнынъ РАББИсининъ бойле сёзлерини илян эт: «Меним шеэрлерим кене боллукъкъа толып ташаджакъ, РАББИ кене Сионгъа теселли береджек, кене Ерусалимни сайлап аладжакъ».

Экинджи руя. Бойнузлар

18 Сонъ мен козьлеримни котерип бакътым: мына, дёрт бойнуз. 19 ^lМеннен лаф эткен Мелектен:

– Бу недир? – деп сорадым.

О да манъа:

– Бу – Ехуданы, Исраильни ве Ерусалимни дагъыткъан бойнузлар, – деди.

20 Сонъ РАББИ манъа дёрт демирджини косьтерди. 21 Мен Ондан:

– Олар не япмагъа келелер? – деп сорадым.

– Шу бойнузлар Ехуданы ойле дагъыттылар ки, кимсе башыны котерип оламай. Бу демирджилер исе Ехуда топрагъыны дагъытмакъ ичюн бойнузларыны котерген халкъларны къоркъузмагъа ве бойнузларыны ерге урмакъ ичюн кельдилер.