Zec 3 | CrhCTB | STEP | РАББИ манъа Мелегининъ огюнде тургъан баш руханий Ехошуаны ве оны къабаатламакъ ичюн сагъ тарафында тургъан Къабаатлайыджыны косьтерди.

‏ Zechariah 3

Дёртюнджи руя. Баш руханий

1 ^aРАББИ манъа Мелегининъ огюнде тургъан баш руханий Ехошуаны ве оны къабаатламакъ ичюн сагъ тарафында тургъан Къабаатлайыджыны косьтерди. 2 ^bРАББИнинъ Мелеги Къабаатлайыджыгъа:

– Къабаатлайыджы, РАББИ сени сёгсюн! Ерусалимни сайлагъан РАББИ сени сёгсюн! О адам атештен чыкъарылгъан яры янгъан одун парчасы киби заваллы дегильми? – деди.

3 Ехошуа исе Мелекнинъ огюнде кирли урбанен тура эди. 4 ^cМелек огюнде отургъанларгъа:

– Кирли урбаларыны устюнден чыкъарынъыз, – деди. Сонъ Ехошуагъа:

– Бакъ, къабаатынъны устюнъден алдым ве санъа байрамлыкъ урба кийдирем, – деди.

5 ^dДаа бойле деди:

– Башына темиз бир сарыкъ сарынъыз.

Онъа урба кийдирдилер ве башына темиз сарыкъ сардылар. РАББИнинъ Мелеги де янында тура эди.

6 РАББИнинъ Мелеги тенбиелеп, Ехошуагъа бойле деди:

– Ордуларнынъ РАББИси бойле дей: 7 Эгер сен Меним ёлларымдан юрсенъ ве Манъа хызмет этсенъ, адалетнен Эвимни башлыкъ этеджексинъ ве азбарымны къоруйджакъсынъ. Мында тургъанларнынъ арасында юрмеге Мен санъа ёл береджегим.

8 Эй, баш руханий Ехошуа, сен ве огюнъдеки, мында олгъанлары яхшы бельги олгъан аркъадашлар, динъленъиз! Бакъынъыз, Мен «Пытакъ» ^{▼▼Бу аетте Алланынъ къулу олгъан «Пытакъ» – теректен осип чыкъкъан янъы пытакъкъа ошагъан Ехуда халкъынынъ падишасыдыр, Давут падишанынъ эвлядыдыр.} къулумны алып кетирем. 9 ^fМен Ехошуанынъ огюне таш къойдым! Бу ташнынъ устюнде еди козь бар. Онынъ устюне бир язы ояджагъым, – дей Ордуларнынъ РАББИси, – ве бир куньде бу топракънынъ гунасыны алып ташлайджагъым. 10 ^gО куню эпинъиз бири-биринъизни озь юзюм ве инджир тереги тюбюнде отурмагъа чагъыраджакъсыз, – дей Ордуларнынъ РАББИси.