Zec 6 | CrhCTB | STEP | Кене козьлеримни котерип бакътым ве мына, эки бакъыр дагъларнынъ арасындан чыкъкъан дёрт дженк арабасыны корьдим.

‏ Zechariah 6

Секизинджи руя. Дёрт дженк арабасы

1 ^aКене козьлеримни котерип бакътым ве мына, эки бакъыр дагъларнынъ арасындан чыкъкъан дёрт дженк арабасыны корьдим. 2 Биринджи дженк арабасында – сары атлар, экинджи арабада – къара атлар, 3 ^bучюнджи арабада – беяз атлар, дёртюнджи арабада – ала атлар бар эди. Атларнынъ эписи кучьлю эди.

4 Меннен лаф эткен Мелектен сорадым:

– Булар недир, эфендим?

5 ^c– Булар – коклернинъ дёрт руху. Олар бутюн дюньянынъ Раббиси огюнде турды ве шимди чыкъаяталар, – деп джевап берди манъа Мелек. 6 – Къара атлары олгъан араба шималь мемлекетке чыкъаята, беяз атлары олгъан араба оларнынъ артындан кете, ала атлары олгъан араба исе дженюп мемлекетке тараф чыкъаята.

7 Кучьлю атлар ёлгъа чыкътылар ве ер юзюни бойдан-бой юрип бакъмагъа беклеп истемедилер.

Мелек оларгъа:

– Айдынъыз, ер юзюни бойдан-бойгъа юрип бакъынъыз, – деди. Олар ойле де эттилер.

8 Сонъра Мелек мени чагъырды ве бойле деди:

– Бакъ, шималь мемлекетке кеткенлер Меним рухумны шималь мемлекетте тынчландырдылар.

Ехошуагъа таджны кийдирмеге эмир

9 РАББИ манъа бойле деди:

10 – Сюргюнликтен Вавилондан къайткъан Хелдай, Товья, Едаядан алтын ве кумюш ал да, шу куню Цефаньянынъ огълу Ёшиянынъ эвине кет. 11 ^dОлардан кумюш ве алтын ал да, таджлар яп ве Ехоцадакънынъ огълунынъ, баш руханий Ехошуанынъ башына къой. 12 ^eОнъа бойле айт:

Ордуларнынъ РАББИси бойле дей: Мына, бу адам – Онынъ Ады «Пытакъ». О тамырындан филис киби оседжек ве РАББИнинъ Сарайыны къураджакъ. 13 РАББИнинъ Сарайыны къураджакъ ве шан-шуретли оладжакъ. О, падиша оладжакъ ве тахтында башлыкъ этеджек. Озь тахтында руханий де отураджакъ. Оларнынъ экиси бирлик ве муаббет арекет этеджек.

14 Таджлар исе, РАББИнинъ Сарайында эслетме оларакъ, Хелемге, Товьягъа, Едаягъа ве Цефаньянынъ огълу Хенге берильсин. 15 ^fУзакъта яшагъанлар келеджек ве РАББИнинъ Сарайыны къурмагъа ярдым этеджек. О вакъыт сиз анълайджакъсынъыз ки, Ордуларнынъ РАББИси мени сизге ёллады. Эгер сиз Алланъыз РАББИнинъ сёзюни динълесенъиз, буларнынъ эписи олып чыкъаджакъ.