a Лев 26.4; Йрм 14.22; Ехез 34.26
b Сай 27.17; Текр 13.1; 3 Пад 22.17; Еш 53.6; Йрм 10.14; 23.25; 50.6; Ехез 34.5; Хав 2.18; Мт 9.36; Мк 6.34
c Ехез 34.17
d Збр 117.22
e 2 Пад 22.43; Збр 17.42; Микъа 7.10
f Ёэль 2.23; Хав 3.18
g Еш 49.19; Ехез 36.11
h Еш 11.11-12; 27.13; 49.20; Хош 11.11; Микъа 7.12
i Ехез 30.13

‏ Zechariah 10

Алла халкъынынъ къуртулувы акъкъында

1 aРАББИден баарьки ягъмурны соранъыз.
РАББИ кучьлю ельни ве сагъанакъны ёллайджакъ
ве эр кеске тарласына осюмликлерни береджек.
 2 bЭв путчыкъларнынъ лафы бош,
фалджылар яланларны коре
ве ялан тюшлерни анълата.
Олар бош лафнен теселли бере.
Онынъ ичюн, къой-эчкилер киби, долашалар,
чобаны ёкъ олгъаны ичюн, хорланалар.

3 c– Ачувым чобанларгъа къаршы къайнады,
Мен ёлбашчыларны джезалайджагъым.
Ордуларнынъ РАББИси Озь сюрюсине,
Ехуда халкъына келеджек,
оларны шанлы дженк аты киби япаджакъ.
 4 dОлардан темельташ,
олардан мых,
олардан дженк яйы,
олардан бутюн халкъ башлыкълары чыкъаджакъ.
 5 eОлар батырлар киби олур,
сокъакълардаки чамур киби,
дженкте душманларыны басаджакъ.
РАББИ оларнен олгъаны ичюн,
дженклешеджеклер
ве атлыларны масхара этеджеклер.
 6Ехуда халкъыны кучьлю этеджегим,
Юсуф эвлятларыны къуртараджагъым
ве сюргюнликтен къайтараджагъым,
чюнки Мен оларны аджыдым.
Санки оларны къалдырмагъаным киби оладжакълар.
Мен – РАББИм, оларнынъ Алласы.
Мен оларгъа джевап береджегим.
 7 fЭфраим къараман киби оладжакъ.
Шарап ичкен киби, юреклери шенъленеджек.
Огъуллары буны корип, къуванаджакъ,
юреклери РАББИде севинеджек.
 8 gМен оларгъа бельги береджегим
ве оларны топлайджагъым,
Мен оларны сатын аладжагъым.
Эвель олгъаны киби,
олар чокъ сайылы оладжакъ.
 9Оларны халкълар арасында ерлештиреджегим,
узакъ мемлекетлерде олар Мени хатырлайджакъ.
Олар анда балаларынен берабер яшайджакъ,
лякин арткъа къайтаджакъ.
 10 hМен оларны Мысырдан алып къайтараджагъым,
Ашшурдан топлайджагъым,
оларны Гилад топрагъына
ве Ливангъа алып кетиреджегим,
лякин оларгъа мында да еткендже ер тапылмайджакъ.
 11 iОлар белялар денъизинден кечеджек,
ве денъизнинъ далгъалары ятышаджакъ,
Нил дерьясынынъ бутюн терен ерлери къуруйджакъ.
Ашшурнынъ къопайлыгъы азлашаджакъ,
Мысырнынъ падишалыкъ таягъы алынаджакъ.
 12Мен оларны РАББИнинъ кучюнен кучьлю этеджегим.
Олар Адымнен яшап, арекет этеджек, – дей РАББИ.
Copyright information for CrhCTB