Zec 2 | CrhCTB | STEP | Мен кене козьлеримни котерип бакътым: мына, къолунда ольчев йипни туткъан бир адам.

‏ Zechariah 2

Учюнджи руя. Ольчев йипи

1 ^aМен кене козьлеримни котерип бакътым: мына, къолунда ольчев йипни туткъан бир адам.

2 ^b– Сен къайда кетесинъ? – деп сорадым.

– Ерусалимнинъ кенълигинен узунлыгъыны бильмек ичюн, оны ольчемеге кетем, – деп джевап къайтарды о манъа.

3 Мына, меннен лаф эткен Мелек чыкъты, къаршысына даа башкъа бир Мелек чыкъты. 4 ^cО, онъа бойле деди:

– Тез-тез кетип, бу огълангъа бойле айт: «Адам чокълугъы ве айванларынынъ номайлыгъы себебинден Ерусалим диварсыз оладжакъ ве бутюн чевре-четни басып аладжакъ». 5 ^dРАББИ даа бойле деди: «Мен Озюм онынъ чевре-четине атештен дивар оладжагъым. Онынъ ичинде Меним Намым янъгъырайджакъ».

Сюргюн этильгенлернинъ эвге чагъырылмасы

6 ^e– Эй, эй! Шималь мемлекетинден къачынъыз! – дей РАББИ. – Мен сизлерни дюньянынъ дёрт тарафына дагъыттым, – дей РАББИ.

7 ^f– Эй, Вавилон къызында яшагъан Сион, джанынъны къуртар!

8 ^gМени ёллагъан шуретли Ордуларнынъ РАББИси сизни чайпагъан халкъларгъа бойле дей, чюнки сизге зарар кетиреджек адам РАББИнинъ энъ къыйметлисине зарар кетирген адамгъа ошар ^{▼▼Къ. еуд. сёзю-сёзюне «сизге тийген адам Онынъ козь бебегине тийген адамгъа ошар» демектир.}:

9 ⁱ– Мына, оларгъа къаршы къолумны котереджегим, ве оларнынъ къуллары оларны чайпайджакъ. Сонъ Ордуларнынъ РАББИси мени ёллагъаныны биледжексинъиз.

10 ^j– Эй, Сион къызы, шенълен ве къуван! Мен келеджегим ве аранъызда яшайджагъым, – дей РАББИ.

11 ^k– О куню чокъ халкълар РАББИге къошуладжакъ ве Меним халкъым оладжакъ. О заман Мен аранъызда яшайджагъым. О вакъыт сиз Ордуларнынъ РАББИси мени ёллагъаныны биледжексинъиз. 12 ^lЕхуда азиз топракъта РАББИнинъ пайы оладжакъ. О, кене Ерусалимни сайлап аладжакъ.

13 Эй, эр тири джан, РАББИнинъ огюнде сесинъизни чыкъарманъыз! О, Озь азиз мескенинден чыкъып келе!