Zechariah 4
Бешинджи руя. Къандиль
1 aМеннен лаф эткен Мелек къайтты ве юкъудан уяндыргъан киби мени уяндырды. 2 b– Не коресинъ? – деп сорады о. – Мына, бутюнлей алтындан япылгъан бир къандильни корем, – деп джевап бердим. – Тёпесинде зейтюн ягъы ичюн бир чаначыкъ, къандильнинъ устюнде де еди лампат, устюндеки лампатларда еди улукъ бар. 3 cДаа эки зейтюн терегини корем: бири чаначыкънынъ сагъ тарафында, экинджиси сол тарафындадыр. 4Меннен лаф эткен Мелектен: – Эфендим, бу не демектир? – деп сорадым. 5Меннен лаф эткен Мелек манъа: – Бунынъ не олгъаныны бильмейсинъми? – деди. – Бильмейим, эфендим, – деп джевап къайтардым.Зеруббавелге берильген адакъ
6 dО заман о манъа бойле деди: – Бу – РАББИнинъ Зеруббавелге айткъан сёзю: «Къудретнен ве кучьнен дегиль, амма Меним Рухумнен ишинъни беджереджексинъ». Ордуларнынъ РАББИси бойле дей. 7 eЭй, буюк дагъ, Зеруббавелнинъ огюнде сен ким оласынъ? Сен – тегиз ерсинъ. Шамата ичинде о, Сарайнынъ темельташыны алып кетиреджек, ве джемаат: «Алла разы олсун! Алла разы олсун!» – деп къычыраджакъ. 8РАББИ манъа даа бойле деди: 9 f– Зеруббавелнинъ къоллары бу Эвнинъ темельташыны къойды, онынъ къоллары да Эвни къурып битиреджек. О заман мени сизге Ордуларнынъ РАББИси ёллагъаныны биледжексинъиз. 10 gБу кунни ким уфакъ деп саяр? Зеруббавелнинъ къолундаки ташкъа ве къуруджылыкъ саркъмасына бу еди козь къуванчнен бакъа. (Олар бутюн ер юзюни корьген РАББИнинъ козьлеридир.) 11О вакъыт мен ондан: – Къандильнинъ онъ ве сол тарафында эки зейтюн терегининъ манасы недир? – деп сорадым. 12– Алтын киби ягъ акъызгъан эки алтын улукънынъ янындаки эки зейтюн пытагъынынъ манасы недир? – деп къайтарып сорадым. 13– Олар не олгъаныны бильмейсинъми? – деди о манъа. – Ёкъ, эфендим, – дедим мен. 14 h– Булар бутюн дюньянынъ РАББИсине хызмет эткен, зейтюн ягъынен сюртюльген эки адамдыр, – деп джевап берди.
Copyright information for
CrhCTB