Zec 7 | CrhCTB | STEP | Дарьявеш падишалыгъынынъ дёртюнджи йылда, докъузынджы айында (Кислев айында), дёртюнджи кунюнде РАББИнинъ сёзю Зекерьягъа кельди.

‏ Zechariah 7

Экиюзьлюлернинъ аштан-сувдан вазгечкени акъкъында

1 ^aДарьявеш падишалыгъынынъ дёртюнджи йылда, докъузынджы айында (Кислев айында), дёртюнджи кунюнде РАББИнинъ сёзю Зекерьягъа кельди. 2 О вакъыт Бет-Эльде яшагъанлар Сар-Эцерни, Регем-Мелекни ве оларнынъ адамларыны РАББИге дува этмеге 3 ве Ордуларнынъ РАББИси Эвинде хызмет эткен руханийлерден ве пейгъамберлерден: «Чокъ йыллар ичинде япкъаным киби, бешинджи айда да аштан-сувдан вазгечмеге ве агъламагъа бизге керекми? ^{▼▼Бу кунь Алланынъ Сарайы йыкъылгъан куню эди.}» – деп сорамагъа ёлладылар.

4 Ордуларнынъ РАББИси манъа бойле деди:

5 ^c– Бу топракънынъ бутюн халкъына ве руханийлерге бойле айт: «Етмиш йыл ичинде бешинджи ве единджи айларда аштан-сувдан вазгечип агълагъанынъызда, сиз буны Меним ичюн яптынъызмы? 6 Ашап-ичкенинъизде, сиз озьлеринъиз ичюн ашайсынъыз ве ичесинъиз. 7 Ерусалимнинъ сакинлери раат ве тынч яшагъан вакъытта, этрафтаки шеэрлеринде, Негевде ве гъарпта яткъан дагъ этеклеринде ^{▼▼Къ. еуд. сёзю-сёзюне «Шефелада» демектир.} адамлар яшагъан вакъытта, РАББИ эвельки пейгъамберлернинъ ярдымынен айны шу сёзлерни айта эди».

Исраиль ёкъ этильгенининъ себеби

8 РАББИ Зекерьягъа бойле деди:

9 ^e– Ордуларнынъ РАББИси бойле дей: Адалетли суд этинъиз, бири-биринъизге мерамет ве шефкъатнен янашынъыз. 10 ^fТул апайны ве оксюзни, кельмешекни ве фукъарени хорламанъыз. Юреклеринъизде бири-биринъизге къаршы яманлыкъ олмасын.

11 Лякин олар динълемеге истемедилер, Менден бетлерини чевирдилер, эшитмемек ичюн де къулакъларыны тыкъаттылар. 12 ^gЮреклерини таш киби къатты яптылар, ве Ордуларнынъ РАББИси Озь Рухунен эвельки пейгъамберлернен ёллагъан Къанунны ве эмирлерини олар динълемеди. Онынъ ичюн Ордулар РАББИсининъ буюк ачувы оларнынъ башына тюшти.

13 ^hОрдуларнынъ РАББИси бойле дей:

– Мен чагъыргъанда, олар динълемеди. Шунынъ ичюн де олар Мени чагъыргъанда, Мен оларны динълемедим. 14 ⁱМен оларны танымагъан халкълар арасында дагъыттым. Бу топракъ олардан сонъ бакъымсыз къалды, анда кимсе бармай, кимсе къайтмай эди. Олар истенильген мемлекетни дешетли ерге чевирдилер.