1Ki 10:14-29 | CrhCTB | STEP | Сулеймангъа эр бир йылда кельген алтын 666 чувал эди.

‏ 1 Kings 10:14-29

Сулейманнынъ зенгинлиги

14 Сулеймангъа эр бир йылда кельген алтын 666 чувал ^{▼▼666 чувал – къ. еуд. «666 киккар».} эди. 15 Бундан гъайры даа алыш-веришчилернинъ ве базиргянларнынъ саткъанлары, эписи Арабистан падишаларынынъ ве топракънынъ башлыкълары бергенлери де бар эди.

16 Сулейман падиша дёгюльген алтындан 200 балабан къалкъан яптырды. Эр бир къалкъангъа алты кило алтын ^{▼▼Алты кило алтын – къ. еуд. «600 (шекель) алтын».} кетти. 17 ^cДаа дёгюльген алтындан 300 кичкене къалкъан япты. Эр бирине бир бучукъ кило алтын ^{▼▼Бир бучукъ кило алтын – къ. еуд. «учь мане алтын».} кетти. Падиша оларны Ливан Орманы эвинде къойды.

18 Падиша фильтиштен балабан тахт яптырды ве оны темиз алтыннен къаплады. 19 Тахтнынъ алты басамагъы бар эди. Тахтнынъ артындаки тёпеси томалакъ эди. Отургъан ернинъ эки къолтугъы бар эди, эки къолтукънынъ янында бирер арслан япылгъан эди. 20 Алты басамакънынъ эки тарафындан он эки дане арслан япылгъан эди. Башкъа падишалыкъларда бу корюльмеген шей эди. 21 ^eСулейман падишанынъ эписи ичкен савутлары алтындан ясалгъан эди. Ливан Орманы эвиндеки савутлар да темиз алтындан ясалгъан эди. Кумюштен бир шей яптырылмагъан эди, чюнки Сулейманнынъ заманында кумюшнинъ ич бир къыймети ёкъ эди. 22 ^fПадишанынъ денъизде Таршиш гемилери ^{▼▼Таршиш гемилери – узун сеферге чыдагъан буюк гемилер.} ве Хирамнынъ гемилери бар эди. Таршиш гемилери учь йылда бир кере келип, алтын, кумюш, фильтиш, маймунларны ве тавус къушларыны кетире эдилер.

23 ^hСулейман падишанынъ зенгинлиги ве икмети ер юзюндеки эр бир падишанынъкисинден зияде олды. 24 ⁱЕр юзюндеки бутюн падишалар Сулейманнен корюшмек, онынъ юрегине Алла берген икметини динълемек истей эдилер. 25 Оларнынъ эр бири озюнден бахшышлар кетире эди. Эр йыл кумюш ве алтын савутлар, урбалар, силя, къокъулы шейлер, ат ве къатырлар кетире эдилер.

26 ^jСулейман озюне дженк арабалары ве атлылар топлады. Онынъ 1 400 дженк арабасы ве 12 000 атлы аскери бар эди. О, оларны дженк арабалары олгъан шеэрлеринде ве Ерусалимде, падишанынъ янында ерлештирди. 27 Падиша Ерусалимде кумюшни адий таш ерине сайдырды, кедрлерни исе чокълугъы ичюн Шефелада оськен инджир тереклеринен тенъ этти. 28 ^kАтларны Сулеймангъа Мысыр ве Кеведен кетире эдилер. Падишанынъ алыш-веришчилери бу атларны Кеведен парагъа сатын ала эдилер. 29 Мысырдан кетирильген дженк арабасы 600 кумюш тура эди. Бир ат исе 150 кумюш ^{▼▼600 кумюш; 150 кумюш – къ. еуд. «600 (шекель) кумюш», «150 (шекель) кумюш».} тура эди. Буларны алыш-веришчилер озь къолларынен хитлилернинъ ве арамлыларнынъ эписи падишаларына да кетире эдилер.