1Ki 7:15-47 | CrhCTB | STEP | Хирам эки бакъыр колонна япты. Эр бирининъ юксеклиги докъуз метр, чевресининъ узунлыгъы алты метр эди.

‏ 1 Kings 7:15-47

Эки бакъыр колонна

15 ^aХирам эки бакъыр колонна япты. Эр бирининъ юксеклиги докъуз метр, чевресининъ узунлыгъы алты метр ^{▼▼Докъуз метр; алты метр – къ. еуд. «18 аммах», «12 аммах».} эди. 16 Колонналарнынъ тёпесине къоймакъ ичюн эки бакъыр капитель ^{▼▼Капитель – колоннанынъ башы.} япты. Эр бир капительнинъ юксеклиги эки бучукъ метр ^{▼▼Эки бучукъ метр – къ. еуд. «5 аммах».} эди. 17 Капителлернинъ устюне орюльген агълар ве едишер орюльген зынджырлар, еди данеси бир капительге, еди данесини экинджи капительге япты. 18 Бойле этип о, колонналарны япты ве капителлернинъ устюндеки таджларнынъ тёпесини къапаткъан агънынъ чевре-четине эки сыра нар япты. Экинджи капительнинъ устюни де тыпкъы ойле япты. 19 Эйваннынъ диреклерине капителлер лейля чечеклери киби япылгъан эди. Оларнынъ юксеклиги эки метр ^{▼▼Эки метр – къ. еуд. «4 аммах».} эди. 20 Эки дирекнинъ устюнде тадж япты. Олар тамам агънынъ устюнде ерлешкен чанакънынъ тёпесине къоюлды. Эки капительнинъ чевре-четинде 200 нар сыралангъан эди. 21 Хирам бу диреклерни Буюк Оданынъ огюнде олгъан Эйванда къойды. Бирисини дженюбий тарафтан къойды ве Якин деп адландырды, экинджисини шималий тарафтан къойып, Боаз деп адландырды. 22 Диреклернинъ устю занбакъ чечеклери киби эди. Бойлеликнен, колонналар битирильди.

«Денъиз» деп адландырылгъан бакъыр хавуз

23 ^fСонъра Хирам къуюлгъан бакъырдан «Денъиз» адландырылгъан бир хавуз ясады. Хавуз бир тарафындан экинджи тарафына къадар беш метр эди, эки бучукъ метр юксекликте ве чевреси 15 метр ^{▼▼Беш метр; эки бучукъ метр; 15 метр – къ. еуд. «10 аммах», «5 аммах», «30 аммах».} эди. 24 ^hХавузнынъ кенарларына эки сыра бакъыр къабакъ япты. Эр ярым метр месафеде онар къабакъ ерлештирильген эди. Къабакълар хавузнен бирликте къуюлгъан эди. 25 Хавуз он эки бугъанынъ устюнде ерлештирильген эди. Бугъаларнынъ учю шимальге бакъа, учю гъарпкъа, учю дженюпке ве учю шаркъкъа бакъа эди. Хавуз бугъаларнынъ устюнде ерлешкен, бугъаларнынъ арт къысымлары ичине бакъа эди. 26 Хавуз бир авуч къалынлыкъта эди. Онынъ четлери чанакънынъ четлери киби олып, ачылгъан занбакъкъа бенъзей эди. Хавуз ичине 2 000 буюк къопкъа ^{▼▼Бир авуч; 2 000 буюк къопкъа – къ. еуд. «бир тофах», «2 000 бат».} сув сыгъа эди.

Бакъыр аякълар

27 Хирам бундан гъайры эки метр узунлыгъында, эки метр кенълигинде ве бир бучукъ метр ^{▼▼Эки метр; эки метр; бир бучукъ метр – къ. еуд. «4 аммах», «4 аммах», «3 аммах».} юксеклигинде он дане бакъыр аякъ япты. 28 Олар бойле япылгъан эди: черчивеге диварчыкъларнен къоюлгъан эдилер. 29 Диварчыкъларда ве черчивелеринде арслан, бугъа ве Керувларнынъ ресимлери япылгъан эди. Арслан ве бугъанынъ тёпесинде ве ашасында урулып япылгъан гульчемберлер бар эди. 30 Эр бир аякънынъ дёрдер бакъыр копчеги ве бакъыр кочерлери бар эди. Дёрт кошесинде, леген тутмакъ ичюн, меснетлер япылгъан эди. Меснетлернинъ эр бир тарафында гульчемберлер къуюлгъан эди. 31 Меснетнинъ ичинде ярым метр теренликте бир бошлукъ бар эди. Бошлукъ тёгерек, черчивесинен кенълиги метрнинъ дёртте учю ^{▼▼Ярым метр; метрнинъ дёртте учю – къ. еуд. «бир аммах», «бир бучукъ аммах».} эди. Бошлукънынъ чевресинде оюлып япылгъан ресимлер бар эди. Аякъларнынъ диварчыкълары тёгерек дегиль, дёрт коше эди. 32 Диварчыкъларнынъ тюбюнде копчеклери бар эди, копчеклернинъ кочерлери аякъкъа къошулгъан эди. Эр бир копчекнинъ юксеклиги метрнинъ дёртте учю эди. 33 Копчеклер араба копчеклери киби япылгъан эди. Кочерлери, къыршавлары, пармакълары ве кобеклери бакъырдан къуюлгъан эди. 34 Аякънынъ дёрт кошесинде дёрт меснет бар эди. Эр бир меснет аякъкъа къошулып къуюлгъан эди. 35 Аякънынъ тёпесинде метрнинъ дёртте бири ^{▼▼Метрнинъ дёртте бири – къ. еуд. «ярым аммах».} юксеклигинде бирер алкъа бар эди. Черчиве ве диварчыкълар аякънынъ устюне къошулгъан эди. 36 Хирам меснетлернинъ янларында ве четлеринде, ве башкъа бош ерлерде Керувлар, арсланлар, пальма тереклери ве гульчемберлерни урып чыкъты. 37 Бойле этип он дане аякъ япты. Эписи бакъырдан къуюлып, бир ольчюде ве бир шекильде эдилер.

38 Бундан гъайры, ювмакъ ичюн Хирам он дане бакъыр леген япты. Эр бирининъ ичине 40 буюк къопкъа ^{▼▼40 буюк къопкъа – къ. еуд. «40 бат».} сув сыгъа эди. Эр бир леген экишер метр кенълигинде эди. Эр леген аякъларнынъ биринде ерлеше эди. 39 Хирам легенлернинъ беш данесини Сарайнынъ дженюбий тарафындан, беш данесини Сарайнынъ шималий тарафындан къойды. Хавузны дженюбий тарафындан, Сарайнынъ дженюп-шаркъий кошесине къойды.

Раббининъ Сарайы ичюн япылгъан шейлернинъ джедвели

40 ⁿХирам легенлер, куреклер, чанакълар япты. Бойлеликнен, Хирам Сулейман падиша РАББИнинъ Сарайы ичюн буюргъан ишини битирди. Мына онынъ япкъан шейлери: 41 эки колонна, колонналарнынъ устюндеки чанакъкъа ошагъан эки капитель, колонналарнынъ устюнде чанакъкъа ошагъан эки капительни къапаткъан эки орюльген агълар, 42 эки колоннанынъ устюндеки чанакъкъа ошагъан капителлерни безеткен эки сыра орюльген агълар ичюн 400 дане нар, 43 он дане аякъ ве он дане аякънынъ устюне къоюлгъан легенлер, 44 «Денъиз» адландырылгъан хавуз ве тюбюндеки он эки бугъа, 45 къопкъалар, куречиклер ве чанакълар. Хирамнынъ Сулейман падишагъа РАББИнинъ Сарайы ичюн ясалгъан шейлерининъ эписи йылтыраткъан бакъырдан эди. 46 ^oПадиша бу шейлерни Иорданнынъ тарафында, Сукъкъот ве Царетан арасында, балчыкълы топракъта къуймагъа буюрды. 47 ^pШейлер о къадар чокъ эди ки, Сулейман оларны чекмеди, ве бакъырнынъ агъырлыгъы белли дегиль эди.