1 Samuel 31
Шаул ве огъулларынынъ эляк олувы
1 aФелестинлилер исраиллилернен дженк эттилер, ве Исраиль аскерлери фелестинлилерден къачып, Гилбоа дагъында эляк олдылар. 2 bФелестинлилер Шаулны ве огъулларыны къувып еттилер ве Шаулнынъ Ёнатан, Авинадав ве Малкий-Шуа огъулларыны ольдюрдилер. 3Шаулгъа къаршы дженк пек дешетли олды. Окъчулар оны тапып, окълар атып, пек агъыр яраладылар. 4 cШаул озюнинъ силя ташыйыджысына: – Къылычынъны чыкъар да, мени ольдюр. Шу сюннетсизлер келип, мени ольдюрмесин, меним устюмден кульмесинлер, – деди. Лякин силя ташыйыджысы бойле япмагъа истемеди, чюнки пек къоркъты. О заман Шаул озь къылычыны алып, къылычынынъ устюне атылды. 5Силя ташыйыджысы Шаулнынъ ольгенини корип, озю де къылычына атылып, Шаулнен берабер ольди. 6Бойледже, шу куню Шаул да, онынъ учь огълу да, силя ташыйыджысы да, бутюн адамлары да берабер ольдилер. 7Вадийнинъ башкъа тарафында ве Иорданнынъ башкъа тарафында яшагъан исраиллилер Исраиль адамларынынъ къачкъаныны, Шаул ве огъуллары ольгенини корип, озь шеэрлеринден къачтылар, фелестинлилер исе анда келип ерлештилер. 8Экинджи куню фелестинлилер ольгенлерни союндырып, устьлериндеки шейлерни таламагъа кельгенде, Гилбоа дагъында эляк олгъан Шаул ве онынъ учь огълуны таптылар. 9 dШаулнынъ башыны кесип, силясыны чекип алдылар ве бутюн Фелестин топрагъына, путларынынъ эвлеринде ве халкъына бу хаберни еткизмек ичюн, хаберджилерни йибердилер. 10 eОнынъ силясыны Ашторет путларынынъ эвинде къойдылар, джеседини исе Бет-Шан диварында астылар. 11 fЯвеш-гиладлылар фелестинлилер Шаулнен насыл шей япкъаныны эшиттилер. 12 gЭписи кучьлю аскерлер, бутюн гедже девамында анда барып, Шаулнынъ ве огъулларынынъ джесетлерини Бет-Шан диварындан алды ве Явешке келип якътылар. 13Кемиклерини алып, Явеште тамариск тереги тюбюнде дефн эттилер ве еди кунь девамында аштан вазгечтилер.
Copyright information for
CrhCTB