Genesis 6:9-22
Нух
9 aМына, Нух ве онынъ эвлятлары акъкъында ривает. О заман яшагъан адамларнынъ арасында тек Нух къусурсыз ве инсафлы адам эди. О, Алланынъ козю огюнде ачыкъ яшай эди. 10Нухнынъ учь огълу бар эди: Шем, Хам ве Яфет. 11Алланынъ козю алдында ер юзю харап олды. Ер юзю акъсызлыкъкъа синъип толды. 12Алла ер юзюне бакъты, ве о, керчектен де харап эди. Ер юзюнде эр бир тири джан юрген ёлуны харап этти. 13Алла Нухкъа: – Мен ер юзюндеки эр бир тири джанны ёкъ этерим. Эр бир тири джан ер юзюни акъсызлыкъкъа толдурды. Мен оларны ве оларнен берабер ер юзюни де ёкъ этерим, – деди. 14– Лякин сен озюнъе гофер ▼▼Гофер – чам терегине ошагъан терек.
терегинден бир сандыкъ яп да, ичини одаларгъа болип, ичини ве тышыны зифтнен зифтле. 15Онынъ узунлыгъы 150 метр, кенълиги 25 метр, юксеклиги де 15 метр ▼▼150 метр; 25 метр; 15 метр – къ. еуд. «300 аммах», «50 аммах», «30 аммах».
олсун. 16Таваны тёпесинден ярым метр ▼▼Ярым метр – къ. еуд. «бир аммах».
юкъары котерильсин. Бир тарафындан къапу ач. Сандыкънынъ ичинде биринджи, экинджи ве учюнджи къатларыны яп. 17Мен ер юзюни сувгъа гъаркъ этерим ве онынъ устюндеки эр бир ичинде аз-бучукъ руху олгъан джанларны ёкъ этерим. Ер юзюнде яшагъан эр бир тири джан гъайып оладжакътыр. 18Лякин санъа Меним васиетим оладжакъ. Сандыкъкъа огъулларынъ, къадынынъ ве келинлеринънен берабер кир, 19янынъа, сеннен сагъ къалсынлар деп, эр бир джанлы махлюкътан эркек-ыргъачыны чифтлеп ал. 20Сеннен сандыкъкъа эписи къушлар, айванлар ве уфакъ махлюкъларнынъ эр бир чешити, сагъ къалмакъ ичюн, чифт-чифт кирсинлер. 21Озюнъе ве оларгъа аш ве емнинъ эр бир чешитини алып азырла. О озюнъе аш, оларгъа ем олур. 22Алла насыл эмир эткен олса, Нух ойле де япты.
Copyright information for
CrhCTB