John 4:43-54
Иса падиша мемурынынъ огълуны тедавийлей
43 aЭки кунь кечкен сонъ, Иса о ерден Галилеягъа кетти. 44 b(О, Озю: «Пейгъамбер озь ветанында урьметсиз къала», – дей эди.) 45 cГалилеягъа кельгенде, галилеялылар Оны яхшы къабул эттилер. Олар Ерусалимдеки байрамгъа барып, о ерде Исанынъ бутюн япкъан ишлерини корьген эдилер. 46 dСонъ Иса кене Галилеянынъ Кана шеэрчигине кельди. Анда О, сувны шарапкъа чевирген эди. Къафарнаум шеэринде исе огълу хаста олгъан бир падишанынъ мемуры бар эди. 47Бу адам Исанынъ Еудиеден Галилеягъа къайткъаныны эшитип, Онынъ алдына барды ве олюм тёшегинде яткъан огълуны келип тедавийлемеси ичюн Исагъа ялварды. 48 e– Сиз аджайип шейлер ве бельгилерни корьмегендже инанмайджакъсыз! – деди онъа Иса. 49– Эфендим, – деди Онъа падишанынъ мемуры, – огъланчыгъым ольмезден эвель, етип кель! 50– Эвинъе бар, огълунъ сагъ-селямет оладжакъ, – деди Иса. О адам Исанынъ айткъанына инанып, кетти. 51О, даа ёлда олгъанда, къуллары оны къаршылап: – Баланъ сагъ-селямет! – дедилер. 52– Саат къачта алы енгиллешти? – деп сорады о. – Сыджагъы тюневин саат бирде тюшти, – деди къуллар. 53 fБаланынъ бабасы, Иса онъа: «Огълунъ сагъ-селямет оладжакъ», – дегени шу вакъыт олгъаныны анълады. О озю ве бутюн эв халкъы Исагъа иман эттилер. 54 gБу, Исанынъ Еудиеден Галилеягъа келип косьтерген экинджи бельгиси эди.
Copyright information for
CrhCTB