Joh 6:5-13 | CrhCTB | STEP | Иса бакъып, чокъ халкъ топлашып, Онынъ тарафына келеяткъаныны корьди. О, Филиптен: – Бу адамларны тойдурмакъ ичюн къайдан отьмек сатын алайыкъ?

‏ John 6:5-13

5 ^aИса бакъып, чокъ халкъ топлашып, Онынъ тарафына келеяткъаныны корьди. О, Филиптен:

– Бу адамларны тойдурмакъ ичюн къайдан отьмек сатын алайыкъ? – деп сорады. 6 Иса бу сёзлерни оны сынамакъ ичюн айтты, Озю исе не япаджагъыны биле эди.

7 – Эки юз динаргъа ^{▼▼Эки юз динар – къ. юн. «200 денарион», 200 кунь чалышкъан адамнынъ къазанчы.} отьмек сатын алсакъ биле, оларнынъ эр бирине бирер парча тиймейджек! – деп джевап берди Филип.

8 ^cО вакъыт шегиртлеринден бири, Симон Пётрнынъ къардашы Андрей Исагъа:

9 – Бу ерде бир огъланда беш арпа отьмек ве эки балыкъ бар, лякин бу къадар адам ичюн о недир? – деди.

10 – Адамларны ерге отуртынъыз, – деди Иса.

О ерде чокъ от бар эди. Адамлар ерге отурдылар. Анда акъайларнынъ сайысы беш бинъге якъын эди. 11 ^dИса отьмеклерни алып, шукюр дувасыны окъуды да, отургъанларгъа, ким не къадар истесе, даркъатты. Балыкъларны да даркъатты.

12 Адамлар ашап тойгъан сонъ, Иса Озь шегиртлерине:

– Къалгъан парчаларны джыйып алынъыз, ич бир шей ёкъ олмасын, – деди.

13 Шегиртлер, адамлар ашагъан беш арпа отьмегинден къалгъан парчаларны джыйып, он эки сепет толдурдылар.