Judges 9:8-15
8 aБир заманларда тереклер озьлерине падиша къоймакъ истедилер. Зейтюн терегине: «Айды, бизим падишамыз ол», – дедилер. 9Лякин о, джевап къайтарып: «Я мен озюмнинъ зейтюн ягъымны бермектен вазгечейимми? Бу ягънен Аллагъа ве инсанларгъа урьмет косьтерелер. Мен башкъа тереклернинъ устюнден пытакъларымны саллап турайыммы?» – деди. 10Сонъ тереклер инджир терегине: «Айды, сен бизим падишамыз ол», – дедилер. 11Лякин о, джевап къайтарып: «Я меним татлылыгъым? Мен энди оны къалдырайыммы, озь яхшы мейваларымны бермектен вазгечейимми? Мен башкъа тереклернинъ устюнден пытакъларымны саллап турайыммы?» – деди. 12Сонъ тереклер юзюмге: «Айды, сен бизим падишамыз ол», – дедилер. 13 bЛякин о, джевап къайтарып: «Мен озюмнинъ шарабымны бермектен вазгечейимми? О, Алланы ве инсанларны къувандыра. Мен башкъа тереклернинъ устюнден пытакъларымны саллап турайыммы?» – деди. 14Сонъунда тереклер когем чалысына: «Айды, сен бизим падишамыз ол», – дедилер. 15 cО исе джевап берип: «Эгер мени керчектен де падиша япсанъыз, айды, келинъиз, меним талдамда сакъланынъыз. Эгер мени падиша япмасанъыз, когем чалысындан атеш чыкъар ве бутюн Ливан кедрлерини ёкъ этер!» – деди.
Copyright information for
CrhCTB