Lev 24:10-16 | CrhCTB | STEP | Бир исраилли къадыннынъ ве мысырлы акъайынынъ бир огълу бар эди. О, исраиллилернинъ ордусына келип, бир исраилли акъайнен къавгъа этти.

‏ Leviticus 24:10-16

Аллагъа къаршы куфюр сёзлер ичюн джеза

10 Бир исраилли къадыннынъ ве мысырлы акъайынынъ бир огълу бар эди. О, исраиллилернинъ ордусына келип, бир исраилли акъайнен къавгъа этти. 11 Исраилли къадыннынъ огълу РАББИнинъ Адыны яманлады ве куфюр сёзлерни айтты. Оны Мусагъа кетирдилер. Анасынынъ ады – Шеломит эди. О, Дан къабилесинден, Диврийнинъ къызы эди. 12 ^aОгъланны сакъчыларнынъ къолуна бердилер ве РАББИнинъ къарарыны бекледилер.

13 РАББИ Мусагъа бойле деди:

14 ^b– Куфюр лаф айткъан огъланны ордудан тыш чыкъар. Айткъанларыны эшиткен эр кес онынъ башына къолларыны къойсун да, бутюн джемаат оны ташнен урып ольдюрсин. 15 ^cИсраиль халкъына бойле айт:

Алласы акъкъында куфюр сёзлер айткъан эр бир адам озь гунасы ичюн джеза алсын. 16 ^dАлланынъ Адыны яманлагъан адам мытлакъа ольдюрильсин. Бутюн джемаат оны ташнен урып ольдюрсин. Кельмешекми, исраиллими РАББИнинъ Адыны яманласа, ольдюрильсин.