Luke 11:14-23
Иса ве Беэльзебул
14 aБир кунь Иса тильсизлик джинини къувып чыкъарды. Джин чыкъкъан сонъ, тильсиз адам лаф этип башлады. Халкъ шашты. 15 bАмма араларындан базылары: – О, джинлерни джинлер башлыгъы Беэльзебулнынъ къуветинен къувып чыкъара, – дедилер. 16 cБашкъалары исе Исаны сынап, коктен бир бельги косьтергенини талап эттилер. 17Лякин Иса, оларнынъ фикирлерини билип: – Озь ичинден болюнген эр бир падишалыкъ йыкъылып бошар, озь ичинден болюнген эв де йыкъылып кетеджек. 18Эгер Шейтан озь ичинден болюнсе, онынъ падишалыгъы насыл тураджакъ? Сиз Меним акъкъымда: «О, джинлерни Беэльзебулнынъ къуветинен къувып чыкъара», – дейсиз. 19 dЭгер Мен джинлерни Беэльзебулнынъ ярдымынен къувып чыкъарсам, кимнинъ ярдымынен джинлерни сизинъ огъулларынъыз къувып чыкъара экенлер? Сизни олар укюм этерлер! 20Эгер Мен джинлерни Алланынъ къуветинен къувып чыкъарсам, демек, Алланынъ Падишалыгъы сизлерге етип кельген. 21Кучьлю адам силяланып озь эвини къаравулласа, онынъ мал-мулькю хавф астында олмаз. 22 eАмма онъа ондан даа кучьлюси уджюм этсе ве енъсе, о ишангъан силяны тутып алыр ве басып алгъан мал-мулькюни болер. 23 fКим Меннен олмаса, Манъа къаршыдыр. Ким Меннен берабер джыймаса, о дагъыта.
Copyright information for
CrhCTB