Luke 19:28-40
Исанынъ Ерусалимге тантананен киргени
28 aБу икяени айткъан сонъ, Иса Ерусалимге таба ёлуны девам этти. 29 bЗейтюн дагъынынъ этегинде ерлешкен Бетфаге ве Бетания койлерине якъынлашкъанда, О, эки шегиртини ёллап: 30– Къаршынъыздаки койге барынъыз. Койге киргенинъизнен, багълы тургъан, шимдигедже устюне адам минмеген яш эшекни тапарсыз. Оны чезип, мында кетиринъиз. 31Эгер сизден: «Эшечикни не ичюн чезесиз?» – деп сорасалар, «О, Раббимизге керек», – деп джевап беринъиз, – деди. 32Иса ёллагъан шегиртлер барып, эр шейни О айткъаны киби таптылар. 33Эшечикни чезеяткъанларда, онынъ саиплери: – Сиз не ичюн эшечикни чезесиз? – деп сорадылар. 34Шегиртлер: – О, Раббимизге керек, – дедилер. 35Эшечикни Исанынъ алдына кетирдилер де, онынъ устюне озь урбаларыны ташлап, Исаны миндирдилер. 36 cИса минип кетеяткъанда, шегиртлер урбаларыны ёлгъа тёшедилер. 37Иса энди Зейтюн дагъындан тюшкен ёлгъа якъынлашкъанда, Онынъ пек чокъ шегиртлери, корьген аджайип шейлерни хатырлап, къуванчкъа толдылар ве кучьлю сеслернен Алланы шерефлеп башладылар: 38 d– Раббининъ Ады иле Келеяткъанны, Падишаны шуретленъиз! Кокте барышыкъ, юкъары Коклерде – шерефлер олсун! – дедилер. 39 eХалкънынъ арасында тургъан бир къач ферисе Исагъа: – Оджа, шегиртлеринънинъ сеслерини кестир! – дедилер. 40 fО исе оларгъа джевап берип: – Сизге айтам: эгер оларнынъ сеслери кесильсе, ташлар къычыраджакълар! – деди.
Copyright information for
CrhCTB