Luke 21:7-19
Беля ве къувгъунлыкълар акъкъында
7 aОлар Исадан: – Оджа, бу шейлер не вакъыт оладжакъ? Буларнынъ якъында оладжагъыны къайдан биледжемиз? Бельги насыл оладжакъ? – деп сорадылар. 8 bИса оларгъа: – Ич кимсе сизлерни алдатмасын деп, сакът олунъыз! Чокъ адамлар: «Мен Месихим» ве «Вакъыт кельди», – деп, Меним Адым иле келеджеклер. Оларнынъ артындан барманъыз. 9Дженк ве исьянлар акъкъында эшиткенде, къоркъманъыз. Булар эвельден олып кечмелери керек, лякин сонъу бирден кельмейджек, – деди. 10 cСонъ Иса девам этип: – Халкъ халкъкъа къаршы, падишалыкъ падишалыкъкъа къаршы котериледжеклер. 11 dШиддетли ер тепренювлери келеджек, тюрлю топракъларда ачлыкълар ве веба хасталыкълары оладжакъ. Коклерде къоркъунчлы вакъиалар ве буюк бельгилер корюнеджеклер. 12 eЛякин буларнынъ эписинден эвель сизни якъалайджакъ ве къувалайджакълар, синагогаларгъа береджеклер ве зинданларгъа ташлайджакълар. Меним Адым ичюн сизни падишалар ве акимлернинъ алдына алып бараджакълар. 13О вакъыт Меним акъкъымда шаатлыкъ этерсиз. 14Акъылынъызда буны тутунъыз: озюмизни насыл къорчалайыкъ, деп эвельден азырланманъыз. 15 fМен сизни ойле бир лафкъа уста ве икметли этерим ки, сизге къаршы чыкъкъанлардан ич бириси къаршынъызгъа турып, ич бир шей айтып оламаз. 16Ана-бабаларынъыз, агъа-къардашларынъыз, достларынъыз ве сой-сопларынъыз сизни сатаджакълар, базыларынъызны исе ольдюреджеклер. 17Меним Адым ичюн эписи сизден нефретленеджеклер. 18 gАмма башынъыздан бир дане сач биле гъайып олмайджакъ. 19Сабырлы олсанъыз, озь джанынъызны къуртараджакъсыз, – деди.
Copyright information for
CrhCTB