Luk 22:47-53 | CrhCTB | STEP | ‌ Иса даа бу сёзлерни айткъанда, топлашып кельген адамлар пейда олдылар. Он экиден бири Иуда адлы адам, башкъаларнынъ огюне чыкъып, Исагъа якъынлашты да, Оны опьмеге ынтылды.

‏ Luke 22:47-53

Исаны якъалайлар

47 ^a‌ ^bИса даа бу сёзлерни айткъанда, топлашып кельген адамлар пейда олдылар. Он экиден бири Иуда адлы адам, башкъаларнынъ огюне чыкъып, Исагъа якъынлашты да, Оны опьмеге ынтылды. 48 Иса онъа:

– Иуда, сен Инсан Огълуны опип сатасынъмы? – деди.

49 ^cИсанынъ янындаки шегиртлери не оладжагъыны анълап:

– Рабби, къылычларнен урайыкъмы? – дедилер. 50 Олардан бириси баш руханийнинъ къулуны урып, онынъ онъ къулагъыны кести. 51 О вакъыт Иса:

– Етер, токътанъыз! – деди де, къулнынъ къулагъына къол тийдирип, оны тедавийледи. 52 Сонъ Оны алмагъа кельген баш руханийлерге, Сарай къаравулларынынъ башлыкъларына ве акъсакъалларгъа:

– Сизлер айдут тутаджакъ киби, къылыч ве таякъларнен силяланып кельдинъиз! 53 ^dМен эр кунь Алланынъ Сарайында сизинъ аранъызда олгъанымда, Манъа къол котермей эдинъиз. Амма шимди сизинъ вакътынъыз, къаранлыкънынъ укюми, – деди.