Luke 24:13-35
Эммаус коюне баргъан ёлда
13 aШу куню шегиртлерден экиси Ерусалимден он эки километр ▼▼Он эки километр – къ. юн. «60 стадиос».
къадар узакълыкъта олгъан Эммаус коюне кетип, 14бутюн бу олгъан шейлер акъкъында озьара лакъырды эте эдилер. 15Олар бойле лаф эткен вакъытта, оларгъа Иса Озю якъынлашып, янларында кетти. 16 cАмма козьлери кёр киби олып, олар Оны танымадылар. 17Иса оларгъа: – Ёл бою не акъкъында лаф этесинъиз? – деди. Олар кедерли корюнип, токътадылар. 18 dШегиртлеринден бириси Клеопас Онъа: – Сен Ерусалимде ябанджысынъмы? Анда бу куньлерде олып кечкен шейлерни бильмейсинъми? – деди. 19Иса олардан: – Насыл шейлерни? – деп сорады. – Назаретли Исанен олып кечкен шейлерни, – дедилер Онъа. – О, Алланынъ ве бутюн халкънынъ огюнде сёзюнен ве ишинен къудретли олгъан бир пейгъамбер эди. 20 eЛякин бизим баш руханийлеримиз ве Шура азаларымыз Оны олюмге бердилер ве хачкъа мыхлаттылар. 21Биз исе Оны Исраильни къуртараджакъ Месих, деп умют эте эдик. Амма даа бир шей олды: энди учь кунь кечкенде, 22къадынларымыз бизни шашырдылар. Саба эрте къабирге барып, 23олар Онынъ тенини тапамадылар, бизге къайтып, мелеклерни корьгенлерини айттылар. Мелеклер оларгъа Исанынъ тири олгъаныны айткъанлар. 24О вакъыт бизимкилерден базылары къабирге барып, эписини шу къадынлар айткъанлары киби таптылар, амма Исанынъ Озюни корьмедилер. 25Иса оларгъа: – Эй, акъылсызлар! Пейгъамберлернинъ айткъанларына иманы агъыр адамлар! 26 fМесих бу азаплардан кечип, Озь шерефине кирмек керекмей эдими? – деди. 27 gСонъ Муса ве эписи Пейгъамберлернинъ Языларындан башлап, Иса оларгъа анда Озю акъкъында язылгъан шейлерни анълатты. 28Олар ёл туткъан койге якъынлашкъанда, Иса Озь ёлуны девам этеджек киби олды. 29Лякин олар: – Бизнен къал. Кунь битеята, энди акъшам олды, – деп Онъа ялвардылар. Иса эвге кирип, оларнен къалды. 30 hОларнен софрада ер алып, Иса отьмекни алып, шукюр этти ве парчалап оларгъа берди. 31О дакъкъасы шегиртлернинъ козьлери ачылды, ве олар Оны таныдылар. Амма Иса бирден оларнынъ козьлеринден гъайып олды. 32Олар бир-бирине: – О бизнен ёл бою лаф эткенде ве Языларны анълаткъанда, юрегимиз къуванып янмай эдими?! – дедилер. 33Олар шу ань ерлеринден турып, Ерусалимге къайттылар. Он бири ве аркъадашларынынъ топлангъан ерине келип киргенлерде, 34 iанда топлашкъанлар: «Раббимиз акъикъатен тирилип, Симонгъа корюнген», – дедилер. 35Кельген шегиртлер ёлда олып кечкен шейлерни, отьмекни парчалагъан дакъкъасы Исаны насыл таныгъанларыны айттылар.
Copyright information for
CrhCTB