Luke 24:15-49
15Олар бойле лаф эткен вакъытта, оларгъа Иса Озю якъынлашып, янларында кетти. 16 aАмма козьлери кёр киби олып, олар Оны танымадылар. 17Иса оларгъа: – Ёл бою не акъкъында лаф этесинъиз? – деди. Олар кедерли корюнип, токътадылар. 18 bШегиртлеринден бириси Клеопас Онъа: – Сен Ерусалимде ябанджысынъмы? Анда бу куньлерде олып кечкен шейлерни бильмейсинъми? – деди. 19Иса олардан: – Насыл шейлерни? – деп сорады. – Назаретли Исанен олып кечкен шейлерни, – дедилер Онъа. – О, Алланынъ ве бутюн халкънынъ огюнде сёзюнен ве ишинен къудретли олгъан бир пейгъамбер эди. 20 cЛякин бизим баш руханийлеримиз ве Шура азаларымыз Оны олюмге бердилер ве хачкъа мыхлаттылар. 21Биз исе Оны Исраильни къуртараджакъ Месих, деп умют эте эдик. Амма даа бир шей олды: энди учь кунь кечкенде, 22къадынларымыз бизни шашырдылар. Саба эрте къабирге барып, 23олар Онынъ тенини тапамадылар, бизге къайтып, мелеклерни корьгенлерини айттылар. Мелеклер оларгъа Исанынъ тири олгъаныны айткъанлар. 24О вакъыт бизимкилерден базылары къабирге барып, эписини шу къадынлар айткъанлары киби таптылар, амма Исанынъ Озюни корьмедилер. 25Иса оларгъа: – Эй, акъылсызлар! Пейгъамберлернинъ айткъанларына иманы агъыр адамлар! 26 dМесих бу азаплардан кечип, Озь шерефине кирмек керекмей эдими? – деди. 27 eСонъ Муса ве эписи Пейгъамберлернинъ Языларындан башлап, Иса оларгъа анда Озю акъкъында язылгъан шейлерни анълатты. 28Олар ёл туткъан койге якъынлашкъанда, Иса Озь ёлуны девам этеджек киби олды. 29Лякин олар: – Бизнен къал. Кунь битеята, энди акъшам олды, – деп Онъа ялвардылар. Иса эвге кирип, оларнен къалды. 30 fОларнен софрада ер алып, Иса отьмекни алып, шукюр этти ве парчалап оларгъа берди. 31О дакъкъасы шегиртлернинъ козьлери ачылды, ве олар Оны таныдылар. Амма Иса бирден оларнынъ козьлеринден гъайып олды. 32Олар бир-бирине: – О бизнен ёл бою лаф эткенде ве Языларны анълаткъанда, юрегимиз къуванып янмай эдими?! – дедилер. 33Олар шу ань ерлеринден турып, Ерусалимге къайттылар. Он бири ве аркъадашларынынъ топлангъан ерине келип киргенлерде, 34 gанда топлашкъанлар: «Раббимиз акъикъатен тирилип, Симонгъа корюнген», – дедилер. 35Кельген шегиртлер ёлда олып кечкен шейлерни, отьмекни парчалагъан дакъкъасы Исаны насыл таныгъанларыны айттылар.Иса он бир эльчиге корюне
36 hОлар буны тариф эткенде, Исанынъ Озю келип, ортагъа турды да, оларгъа: – Селям алейкум! – деди. 37 iОлар шашып, бир хаялет корьгенлерини тюшюнип, пек къоркътылар. 38Иса оларгъа: – Сиз неден къоркътынъыз? Юреклеринъизде не ичюн бойле шубелер бар? 39 jЭллериме, аякъларыма бакъынъыз – бу Меним! Манъа тийип бакъсанъыз, корерсиз. Эт ве кемик рухта олмай, Менде исе бар, – деди. 40Буны айткъан сонъ, оларгъа къолларыны ве аякъларыны косьтерди. 41 kКъуванып тааджипленген ве даа инанып оламагъан шегиртлеринден Иса: – Сизде ашаладжакъ бир шей бармы? – деп сорады. 42Олар Онъа пишкен балыкъ кесегини бердилер. 43Иса оны алып, козьлери огюнде ашады. 44Сонъ оларгъа шойле деди: – Мен даа сизнен берабер олгъанда, Мусанынъ Къанунында, Пейгъамберлернинъ Языларында ве Зебур китабында Меним акъкъымда язылгъанларнынъ эписи беджерильмек керектир, дей эдим. 45 lСонъ Иса акъылларына Мукъаддес Языларны анъламагъа кучь берди. 46 mО оларгъа: – Мукъаддес Языларда, Месих азаплар чекеджек ве учюнджи куню олюлер арасындан тураджакъ, деп язылгъандыр. 47Ерусалимден башлап, эписи халкъларгъа илян этиледжектир ки, Месихнинъ Адынен тёвбе этселер, гуналары багъышланаджакълар. 48 nСиз бу шейлерге шаат оладжакъсыз. 49 oМен сизге Бабам ваде эткен шейни берейим. Лякин юкъарыдан келеджек къудреттен кучь алмагъандже, шеэрде къалынъыз, – деди.
Copyright information for
CrhCTB