Luk 4:1-13 | CrhCTB | STEP | Иса Мукъаддес Рухкъа толып, Иордан озенинден къайтты. Рух Оны сахрагъа алып кетти.

‏ Luke 4:1-13

Исаны сахрада Шейтан сынай

1 ^aИса Мукъаддес Рухкъа толып, Иордан озенинден къайтты. Рух Оны сахрагъа алып кетти. 2 ^bАнда Шейтан Исаны къыркъ кунь девамында сынавдан кечирди. О куньлерде Иса бир шей ашамай эди ве сонъунда пек ач олды. 3 Шейтан Онъа:

– Эгер Сен Алланынъ Огълу олсанъ, мына бу ташкъа айт, отьмек олсун, – деди.

4 ^cИса онъа джевап берип:

– Алланынъ Китабында язылгъан ки, яшамакъ ичюн адамгъа ялынъыз аш ашамакъ етерли дегиль.

5 Сонъ Шейтан Исаны юксек бир ерге чыкъарып, бир ань ичинде Онъа дюньянынъ эписи падишалыкъларыны косьтерди. 6 ^dШейтан Исагъа:

– Мен бу падишалыкъларны, оларнынъ бутюн къудретинен ве шан-шуретинен берабер Санъа берерим. Олар эписи манъа берильгенлер, ве мен оларны истегениме береджем. 7 Шунынъ ичюн, Сен манъа бель буксенъ, эписи Сенинъки оладжакъ, – деди.

8 ^eИса онъа джевап берип:

– Алланынъ Китабында бойле язылгъан: Раббинъе Алланъа белинъни бук, тек Онъа ибадет эт, – деди.

9 Сонъ Шейтан Оны Ерусалимге алып кельди ве Алла Сарайынынъ тёпесине турсатып:

– Эгер Сен Алланынъ Огълу олсанъ, Озюнъни бу ерден ашагъа ташла. 10 ^fАлланынъ Китабында язылгъан ки, О, Сени къорчаламагъа Озь мелеклерине эмир этер, 11 олар Сени къолларында котерип кетерлер, аякъларынъ ташкъа сюрюнмез.

12 ^gИса онъа:

– Бойле деп язылгъан: Раббинъни, сенинъ Алланъны сынама, – деди.

13 Шейтан, Исаны сынамагъа битирип, вакътынджа Оны къалдырып кетти.