Mark 10:1-12
Айрылышув акъкъында Исанынъ огретюви
1 aИса, о ерден чыкъып, Иордан озенининъ артындаки Еудие мемлекетине кельди. Онынъ этрафында кене де пек чокъ адам топланды. Озь адети боюнджа Иса адамларны огрете башлады. 2Базы фериселер Оны сынамакъ ниетинен якъынлашып: – Къанун боюнджа акъайгъа озь апайындан айырылмакъ мумкюнми? – деп сорадылар. 3Иса исе олардан: – Муса сизлерге не буюргъан? – деп сорады. 4 b– Муса, акъай айрылышув кягъытыны язып апайындан айырылмагъа мумкюн, деп, разылыкъ берген, – деди фериселер. 5Иса оларгъа джевап берип: – Юреклеринъиз таш киби олгъаны ичюн, сизлерге бу эмирни язып къалдырды, – деди. 6 c– Аслында, Алла дюньяны яраткъанда, адамларны эр киши ве къадын киши оларакъ яратты. 7 dШу себептен акъай, ана-бабасыны къалдырып, озь апайына япышаджакъ, 8ве олар экиси бир вуджут оладжакълар. Бойледже, олар энди эки дегиль, бир беден сайылалар. 9 eАлла къошкъаныны адам айырмасын. 10Эвге кельген сонъ, шегиртлери Исадан кене шу шейни сорадылар. 11О, оларгъа: – Ким, озь апайындан айырылып, башкъасына эвленсе, сабыкъ апайына нисбетен аиле садыкълыгъыны боза, – деди. 12 f– Апай да, озь акъайынен айырылып, башкъасына чыкъса, аиле садыкълыгъыны боза.
Copyright information for
CrhCTB