Mark 12:28-34
Энъ муим эмир
28 aКъанун оджаларындан бири, оларнынъ давасыны эшитип, Исанынъ яхшы джевап бергенини корьди. Онынъ янына келип: – Алла эмирлерининъ энъ муими къайсы? – деп сорады. 29Иса онъа: – Бутюн эмирлерден энъ муими будыр: Динъле, Исраиль! Рабби-Таалямыз – бирден-бир Раббидир. 30 bРабби-Таалянъны бутюн юрегинънен, бутюн джанынънен, бутюн акъылынънен ве бутюн къуветинънен сев. 31 cЭкинджиси исе бойле: якъын адамны озюнъни севгенинъ киби сев. Булардан даа буюк эмир ёкъ, – деди. 32 d– Яхшы айттынъ, Оджа, – деди Къанун оджасы. – Алла – бирден-бирдир, Ондан башкъа кимсе ёкъ, деп догъру айттынъ. 33 eОны бутюн юрек, джан, акъыл ве къуветинънен севмек, якъын адамны да озюнъни севгенинъ киби севмек – эписи бутюнлей якъылгъан къурбанлардан ве бахшышлардан муимдир. 34 fИса, онынъ акъыллы джевап бергенини корип: – Сен Алланынъ Падишалыгъындан узакъ дегильсинъ, – деди. Бундан сонъ кимсенинъ Онъа суаль бермеге джесарети етмеди.
Copyright information for
CrhCTB