Mar 13:14-23 | CrhCTB | STEP | ‌ Эгер «пис арамлыкъ» ляйыкъ олмагъан ерде тургъаныны корьсенъиз (окъугъан адам озю анъласын!), Еудиеде олгъан адамлар дагъларгъа къачсынлар.

‏ Mark 13:14-23

Буюк беля

14 ^a‌ ^bЭгер «пис арамлыкъ» ляйыкъ олмагъан ерде тургъаныны корьсенъиз (окъугъан адам озю анъласын!), Еудиеде олгъан адамлар дагъларгъа къачсынлар. 15 ^cДам устюнде тургъан адам ашагъа тюшип, бир шей алмакъ ичюн эвине кирмесин. 16 Тарлада олгъан адам усть урбасыны алмагъа къайтып бармасын. 17 ^dО куньлерде юклю ве бала эмиздирген къадынларгъа беля оладжакъ! 18 Къачувынъыз къышта олмасын деп, дувалар окъунъыз. 19 ^eШу куньлерде, Алла дюньяны яраткъан вакъыттан башлап бу куньлерге къадар олмагъан ве даа бир кере олмайджакъ буюк белялар оладжакъ. 20 ^fЭгер Рабби о куньлернинъ сайысыны азлаштырмагъан олса, ич бир джан къуртулып оламаз эди. Лякин О, сайлагъан адамларнынъ хатири ичюн, шу куньлерни азлаштырды. 21 ^gЭгер о вакъыт кимдир сизге: «Бакъынъыз, Месих мында!» я да: «О, анда!» – десе, инанманъыз. 22 ^hЯлан месихлер ве ялан пейгъамберлер пейда олып, имкяны олса, сайлангъанларны биле ёлдан урмакъ ичюн, аджайип шейлер япаджакълар ве бельгилер косьтереджеклер. 23 ⁱСизлер исе сакът олунъыз. Мен буны сизлерге эвельден айтып берем.