Mark 14:53-65
Иса Юксек Шура алдында
53 aИсаны баш руханийнинъ алдына алып кельдилер. Анда эписи баш руханийлер, акъсакъаллар ве Къанун оджалары топлангъанлар. 54Пётр исе Исанынъ пешинден узакътан барып, баш руханийнинъ азбарына кирди ве, хызметчилернен берабер атеш янында отурып, къызына башлады. 55Баш руханийлер ве бутюн Юксек Шура, Исагъа олюм джезасы чыкъармакъ ичюн, Оны къабаатлагъан шаатны къыдырсалар да, тапып оламадылар. 56 bОларда чокъ ялан айткъан шаатлар олса да, лафлары бир-бирине келишмей эди. 57Ялан шаатлардан базылары сёзге чыкъып: 58 c– О: «Инсан къолунен къурулгъан Алланынъ бу Сарайыны бозып, учь куньде адам къолунен къурулмагъан, башкъа Сарайны къурарым», – дегенини эшиттик, – дей эдилер. 59Лякин бу шаатлар бир-биринен келишмей эди. 60 dБиринджи баш руханий еринден турып, ортагъа чыкъты ве Исадан сорады: – Сен не ичюн джевап къайтармайсынъ? Оларнынъ Санъа къаршы шаатлыкъларына не айтаджанъ? 61 eИса исе индемеди ве ич бир джевап къайтармады. Баш руханий Онъа даа бир суаль берди: – Шуретли Алланынъ Огълу, Месих – Сенсинъми? – деди. 62 fИса: – Меним, – деди. – Инсан Огълу Къудретли Алланынъ онъ тарафында отургъаныны ве коктеки булутларнен берабер кельгенини кореджексиз. 63 gБуны эшиткен баш руханий устюндеки урбаларыны йыртып: – Бизлерге башкъа шаатларнынъ неге кереги бар? 64 hКуфюр сёзлерни озьлеринъиз эшиттинъиз. Бунъа не дейджексиз? – деди. Эписи Исаны, олюмге ляйыкъ, деп, джезагъа укюм эттилер. 65 iБазылары Онъа къаршы тюкюре башладылар. Онынъ бетини къапатып, башына урдылар ве: – Пейгъамберлигинъни косьтер! – деп къычырдылар. Сонъ хызметчилер де Оны урмагъа башладылар.
Copyright information for
CrhCTB