Mark 15:33-41
Исанынъ олюми
33 aУйле вакътындан саат учьке къадар бутюн дюньяны къаранлыкъ басты. 34 bСаат учьте Иса къатты сеснен: – Элои, Элои, лема савахтани? – деп къычырды. Бу сёзлернинъ терджимеси: «Аллам, Аллам! Сен не ичюн Мени къалдырып кеттинъ?» – демектир. 35О ерде тургъанларнынъ базылары, буны эшитип: – Бакъынъыз, О, Ильясны чагъыра, – дедилер. 36 cБириси исе, чапып барып, сюнгерни экши шарапкъа батырып, таякъ уджуна илиштирди де, Исагъа узатты. Сонъ: – Токътанъыз, бакъайыкъ, Ильяс келип, Оны хачтан тюшюрир экенми? – деди. 37Амма Иса, даа бир кере къычырып, сонъки нефесини чыкъарды. 38 dШу ань Алланынъ Сарайындаки перде тёпеден ашагъадже йыртылып, экиге болюнди. 39Исанынъ къаршысында тургъан юзбашы, Онынъ джан бергенини корип: – Акъикъатен бу Адам – Алланынъ Огълу экен! – деди. 40 eО ерде узакътан бакъып тургъан къадынлар бар эди. Олар арасында магдалалы Мерьем, кучюк Якъупнен Йосенинъ анасы Мерьем ве Саломе бар эдилер. 41Иса Галилеяда олгъанда, олар Онъа хызмет этип, пешинден юре эдилер. О ерде Исанен Ерусалимге кельген башкъа къадынлар да бар эди.
Copyright information for
CrhCTB