Mark 3:20-27
Мукъаддес Рухкъа къаршы айтылгъан куфюр сёзлер акъкъында
20 a bБундан сонъ Иса эвине къайтты. Анда кене о къадар адам топланды ки, оларгъа бир тилим отьмек ашамагъа биле вакъыт олмады. 21 cИсанынъ якъын адамлары буны эшитип: – О акъылдан азды, – деп, Оны алып кетмеге кельдилер. 22 dЕрусалимден кельген Къанун оджалары: – Онынъ ичинде Беэльзебул шейтан бар! Шунынъ ичюн О, джинлерни джинлер башлыгъы къуветинен къувып чыкъара! – дедилер. 23Иса исе, оларны янына чагъырып, кинаели икяелер айтып башлады: – Шейтан Шейтанны насыл къувып чыкъараджакъ? 24Эгер бир падишалыкъ озь ичинден болюнсе, о падишалыкъ аякъта туралмаз. 25Эгер бир эв озь ичинден болюнсе, о эв аякъта туралмаз. 26Эгер Шейтан озюне къаршы чыкъса, о, аякъ устюнде туралмаз, амма онынъ сонъки куню якъынлашты. 27 eКимсе, кучьлю адамнынъ эвине кирип, онынъ малыны хырсызламаз. Амма башта кучьлю адамны багъласа, бутюн мал-мулькюни хырсызлап кетер.
Copyright information for
CrhCTB