Mar 5:1-20 | CrhCTB | STEP | Олар гольнинъ къаршы тарафындаки герасалыларнынъ юртуна келип чыкътылар.

eЗбр 65.16

‏ Mark 5:1-20

Иса джинлер ургъанны тедавийлей

1 ^aОлар гольнинъ къаршы тарафындаки герасалыларнынъ юртуна келип чыкътылар. 2 Иса къайыкътан тюшкенинен, бирден Онъа таба шу ердеки къабирлернинъ арасындан джин ургъан бир адам чыкъты. 3 Мезарлыкъта яшагъан бу адамны кимсе зынджырларнен биле багълап оламай эди. 4 Оны чокъ керелер зынджырларнен багълап, аякъларына бугъавлар кирсетселер де, о зынджырларны узип, бугъавларны сындырып ташлай эди. Онъа кимсенинъ кучю етмей эди. 5 Гедже-куньдюз токътамайып, къабирлер арасында, къырлар устюне чыкъып, озюни ташларнен урып, багъырып юре эди. 6 О, Исаны узакътан корип, чапып кельди де, Онынъ аякълары огюне бель букип, 7 ^bбар сесинен ялварды:

– Эй, Иса, Юдже Алланынъ Огълу, менде не ишинъ бар? Алланынъ акъкъы ичюн, мени къыйнама!

8 (Иса джинге: «Эй, джин, бу адамдан чыкъып кет!» – деген эди.)

9 Иса ондан:

– Адынъ не? – деп сорады.

– Адым Орду ^{▼▼Орду – къ. юн. «легион», Рим ордусынынъ, 6 000 аскери олгъан, бир къысмы.}, чюнки бизлер чокъмыз, – деп джевап берди о.

10 Джинлер, Иса оларны бу юрттан айдап чыкъармамасы ичюн, Онъа чокъ ялварды.

11 Шу ерлердеки бир байыр тёпесинде буюк бир домуз сюрюси отлап юре эди. 12 Джинлер Исагъа ялварып:

– Бизни бу домузларгъа ёлла, оларгъа кирейик, – дедилер.

13 Иса оларгъа разылыкъ берди. Джинлер адамдан чыкъып, домузларгъа кирдилер. Сонъ эки бинъге якъын домуз тик къая устюнден гольге секирип, сув ичинде богъулып ольдилер.

14 Домузларны отлаткъан адамлар къачып кетип, бу адисе акъкъында шеэрде ве онынъ этрафларындаки къасабаларда биле айтып чыкътылар. Бутюн адамлар не олгъаныны бакъмагъа кельдилер. 15 Олар Исанынъ янына келип, бакъсалар, анавы, бир орду джин ургъан адамнынъ акъылы озюне кельгенини, озю де кийинип-къушанып отургъаныны корьдилер ве пек къоркътылар. 16 Бу вакъианы корьгенлер о адам джинлеринден насыл къуртулгъаныны ве домузлар неге огърагъанлары акъкъында халкъкъа тариф эттилер. 17 ^dОнынъ ичюн бу ернинъ сакинлери Исаны оларнынъ юртундан кеткенини истедилер.

18 Иса къайыкъкъа отургъанда, джинлеринден къуртулгъан адам Онен берабер кетмеге разылыкъ сорады. 19 ^eАмма Иса разылыкъ бермеди.

– Озь эвинъе, якъынларынъа бар, оларгъа Рабби сени аджып, не япкъаныны ве санъа мерамет косьтергенини айтып бер, – деди онъа.

20 ^fАдам кетти, Иса онъа не япкъаныны Он Шеэр ^{▼▼Он Шеэр – къ. юн. «Декаполис».} топракъларында айтып юре башлады. Буны эшиткенлер шашып къала эдилер.