Mark 6:30-44
Иса беш бинъ адамны тойдура
30 a bЭльчилер Исанынъ янына къайтып, насыл ишлер япкъанларыны, халкъкъа нелер огреткенлерини айтып бердилер. 31 cИса оларгъа: – Энди тынч ве адамсыз бир ерге барынъыз, бир озюнъиз къалып, раатланынъыз, – деди. Келип-кеткенлернинъ чокълугъындан оларнынъ аш ашамагъа биле вакъты ёкъ эди. 32Иса шегиртлеринен къайыкъкъа минип, адам олмагъан бир ерге ёл алды. 33Амма адамлар оларнынъ кетеяткъанларыны корьдилер, ве чокъ адамлар Исаны таныдылар. Якъын шеэрлернинъ сакинлери джаяв ёлгъа чыкъып, Исанен шегиртлери бараяткъан ерге ялыдан чапып, олардан эвель етип кельдилер. 34 dИса къайыкътан чыкъып, чокъ адамларны корип, оларны аджыды. Олар чобансыз къойларгъа ошай эдилер. Иса оларгъа чокъ шейлерни огретип башлады. 35Баягъы вакъыт кечкен сонъ, шегиртлери Исанынъ янына келип: – Бу ерде кимсе яшамай экен, эм энди кеч олды. 36Халкъны йибер, этрафтаки койлерге барып, озьлерине аш сатын алсынлар. Оларнынъ ашамагъа ич бир шейлери ёкъ да, – дедилер. 37 eИса исе: – Сизлер оларгъа аш беринъиз! – деди. – О къадар пара къайдан алайыкъ? Бу адамларны тойдурмакъ ичюн, эки юз динар ▼▼Эки юз динар – къ. юн. «200 денарион», я да 200 кунь чалышкъан адамнынъ къазанчы.
керек! – дедилер Онъа. 38Иса: – Не къадар отьмегинъиз бар? Барып бакъынъыз, – деди. Олар бакъып келип: – Беш дане отьмек ве эки дане балыкъ бар, – дедилер. 39Иса шегиртлерине халкъны топ-топ этип ешиль отлар устюне отуртмакъны буюрды. 40Адамлар юзер ве эллишер олып, группаларнен отурдылар. 41Иса беш отьмекнен эки балыкъны алды, козьлерини коклерге котерип, шукюр дувасыны окъуды. Отьмеклерни болип, адамларгъа даркъатмакъ ичюн шегиртлерине берди. Эки балыкъны да эписине болип берди. 42Эр кес ашап тойды. 43Сонъ артып къалгъан отьмек парчаларынен ве балыкъларнен даа он эки сепет топладылар. 44Отьмек ашагъанларнынъ арасында тек акъайлардан беш бинъ эди.
Copyright information for
CrhCTB