Mat 10:5-15 | CrhCTB | STEP | Иса он экини ёллагъанда, оларгъа бойле насиат берди: – Башкъа миллетлернинъ топракъларына барманъыз ве самариелилернинъ шеэрлерине кирменъиз.

‏ Matthew 10:5-15

Он эки шегиртке насиат

5 ^aИса он экини ёллагъанда, оларгъа бойле насиат берди:

– Башкъа миллетлернинъ топракъларына барманъыз ве самариелилернинъ шеэрлерине кирменъиз. 6 ^bЛякин ёлуны джойгъан къойларгъа – Исраиль халкъынынъ алдына барынъыз. 7 ^cКетинъиз ве: «Кок Падишалыгъы якъынлашты», – деп илян этинъиз. 8 ^dХасталарны тедавийленъиз, олюлерни тирильтинъиз, лепра хасталыгъына огърагъанларны эляллап тедавийленъиз, джинлерни къувып чыкъарынъыз. Бедава алдынъыз – бедава беринъиз.

9 Къушагъынъызгъа алтын, кумюш ве бакъыр акъча биле алманъыз. 10 ^eЁлгъа не торба, не эки дане урба, не аякъкъап ве таякъ биле алманъыз. Чалышкъан адам озь отьмегини къазаныр. 11 Шеэр я да къасабагъа келип, о ерде ляйыкъ бир адам тапынъ ве шу ерден чыкъмагъандже, онынъ эвинде къалынъыз. 12 Эвге киргенде, селям беринъиз. 13 Эгер о эв бунъа ляйыкъ олса, тилеген барышыгъынъыз анда кирсин, ляйыкъ олмаса исе, сизге къайтып кельсин. 14 ^fКим исе сизни къабул этмесе ве сёзлеринъизге къулакъ асмаса, о эвден я да шеэрден чыкъып кетеяткъанда, аякъларынъыздан тозны биле къакъып кетинъиз. 15 ^gСизге айтам: Ахирет кунюнде бойле шеэрнинъ алына коре, Содом ве Гоморанынъ алы енгиль олур.