a Мк 4.1-9; Лк 8.4-8
b Йрм 4.3
c Мт 11.15

‏ Matthew 13:1-9

Урлукъ сачыджы акъкъында кинаели икяе

1 aШу куню Иса эвден чыкъып, голь янында отурды. 2Онынъ этрафында баягъы адам топланды. Иса къайыкъкъа чыкъып отурмагъа меджбур олды, бутюн халкъ исе ялыда турды. 3Иса оларгъа чокъ шейлер акъкъында кинаели икяелер айтты:

– Бир урлукъ сачыджы тарлагъа чыкъа. 4О, урлукъ сачкъанда, базы урлукълар ёл кенарына тюше. Шу арада къушлар учып келелер де, урлукъларны чокъуп, ёкъ этелер. 5Башкъа урлукълар ташлы, топракъ аз олгъан ерге тюше ве тезден осип чыкъалар, чюнки топракъ бу ерде юфкъа экен. 6Кунеш чыкъкъан сонъ исе, оларны якъа ве яхшы тамыр атмагъанларындан, фиданлар къуруп къалалар.

7 bБашкъалары тикенлер арасына тюше, тикенлер тез осип урлукъларны богъып ташлайлар.

8Даа башкъа урлукълар исе яхшы топракъкъа тюшип, бир урлукъ – юз къат, башкъасы – алтмыш ве даа башкъасы – отуз къат арткъач берекет берелер.

9 cКъулагъы барлар буны эшитсинлер!
Copyright information for CrhCTB