Matthew 13:10-17
Кинаели икяелернинъ макъсады
10 aШегиртлер Исанынъ янына келип: – Сен не ичюн оларнен кинаели икяелер айтып лаф этесинъ? – деп сорадылар. 11 bО, оларгъа джевап берип: – Кок Падишалыгъынынъ сырлары сизге ачылгъан, оларгъа исе къапалы, – деди. 12 c– Кимде бар олса, онъа даа бериледжек, ве онда арткъач оладжакъ. Кимде ёкъ олса, олгъаны да тутып алынаджакъ. 13 dОларнен кинаели икяелер ярдымынен лаф этем, чюнки олар бакъа ве корьмейлер, динълей ве эшитмейлер, ве анъламайлар. 14Ешаянынъ пейгъамберлиги оларда эда этиле: Къулакъларынъызнен эшитеджексиз,амма анъламайджакъсыз,
козьлеринъизнен бакъаджакъсыз,
амма корип оламайджакъсыз.
15 eБу халкънынъ юреги бир шей анълап оламай,
къулакълары агъыр эшите,
оларнынъ козьлери де юмулгъан.
Бойледже, олар козьлеринен корьмезлер,
къулакъларынен эшитмезлер,
акъылларынен анъламазлар.
Оларны тедавийлесин деп,
Аллагъа кельмезлер.
16 fСизинъ козьлеринъиз бахтлы, чюнки олар корелер. Къулакъларынъыз да бахтлы, чюнки эшителер. 17 gСизге догърусыны айтам: чокъ пейгъамберлер ве инсафлы адамлар сиз корьгенинъизни корьмеге истей эдилер, лякин корьмедилер, сиз эшиткенлеринъизни эшитмеге истей эдилер, лякин эшитмедилер.
Copyright information for
CrhCTB