Mat 15:21-28 | CrhCTB | STEP | ‌ Иса о ерден чыкъып, Тир ве Сидон юртларына кетти.

‏ Matthew 15:21-28

21 ^a‌ ^bИса о ерден чыкъып, Тир ве Сидон юртларына кетти. 22 ^cАнда Онынъ алдына шу ерлерде яшагъан бир ханаанлы къадын кельди.

– Эфендим, Давутнынъ Огълу, мени аджы! Къызымны джин урды, ве пек къыйнай, – деп къычырды.

23 Лякин Иса онъа бир сёз биле къайтармады. Шегиртлери келип:

– Айтса онъа, кетсин! Артымыздан къычырып юре, – деп Исагъа риджа эттилер. 24 ^dИса:

– Мен тек Исраиль халкъынынъ адашкъан къойларына йиберильген эдим, – деди.

25 Амма къадын якъынджа келип, Исанынъ алдында озюни ерге ташлады ве:

– Эфендим, манъа ярдым эт! – деди.

26 ^e– Балалардан отьмекни алып, копеклерге ташламакъ яхшы дегиль, – деди Иса.

27 – Эбет, Эфендим, амма копеклер де эфендисининъ софрасындан тюшкен отьмек уфакъларыны ашайлар! – деди къадын. Сонъ Иса:

28 – Эй, къадын, сенинъ иманынъ буюк! Истегенинъ олсун! – деди.

Къадыннынъ къызы шу ань тедавийленди.