Matthew 27:45-56
Исанынъ олюми
45 aУйледен башлап саат учьке къадар бутюн дюньяны къаранлыкъ басты. 46 bСаат учьлерде Иса къатты сеснен къычырып: – Эли, Эли, лема савахтани? – деди. Бу сёзлернинъ терджимеси: «Аллам, Аллам! Сен не ичюн Мени къалдырып кеттинъ?» – демектир. 47О ерде тургъанлардан базылары буны эшитип: – О, Ильясны чагъыра, – дедилер. 48 cОлардан бириси тез-тез чапып барып, сюнгерни экши шарапкъа батырып, таякъ уджуна илиштирди де, Исагъа узатты. 49Башкъалары исе: – Токъта бакъайыкъ, Ильяс келип Оны къуртараджакъмы? – дедилер. 50Иса исе даа бир кере къатты сеснен къычырып, сонъки нефесини чыкъарды. 51 dШу ань Алла Сарайындаки перде тёпеден ашагъадже йыртылып, экиге болюнди. Ер титреди, къаялар ярылды. 52 eКъабирлер ачылды ве чокъ раметли азизлер тирильди. 53 fОлар къабирлеринден чыкъып, Иса тирильген сонъ мукъаддес шеэрге кирдилер ве чокъ адамларгъа корюндилер. 54Исаны къаравуллагъан юзбашы ве онынъ аскерлери ер титрегенини ве башкъа вакъиаларны корип, пек къоркътылар ве: – Акъикъатен О – Алланынъ Огълу экен! – дедилер. 55Анда чокъ къадынлар да узакътан бакъып турмакъта эдилер. Олар Галилеядан башлап Исанынъ пешинден кетип, Онъа хызмет эткен эдилер. 56 gОларнынъ арасында магдалалы Мерьем, Якъупнен Юсуфнынъ анасы Мерьем эм де Зебедай огъулларынынъ анасы бар эди.
Copyright information for
CrhCTB