Mat 4:1-11 | CrhCTB | STEP | Сонъ Шейтаннынъ сынавындан кечмек ичюн, Рух Исаны сахрагъа алып барды.

‏ Matthew 4:1-11

Исаны Шейтан сынай

1 ^aСонъ Шейтаннынъ сынавындан кечмек ичюн, Рух Исаны сахрагъа алып барды. 2 ^bИса къыркъ кунь ве къыркъ гедже аштан вазгечип, пек ач олды. 3 ^cОнынъ янына Сынавджы кельди де:

– Эгер Сен Алланынъ Огълу олсанъ, айтчы, бу ташлар отьмек олсунлар! – деди. 4 ^dИса онъа джевап берип, шойле деди:

– Алланынъ Китабында бойле язылгъан: Яшамакъ ичюн адамгъа ялынъыз аш ашамакъ етерли дегиль, онъа Алланынъ агъзындан чыкъкъан эр сёз керек.

5 ^eСонъ Шейтан Исаны Ерусалимге, мукъаддес шеэрге кетирди, Алланынъ Сарайы тёпесине къойып, 6 ^fбойле деди:

– Эгер Сен Алланынъ Огълу олсанъ, Озюнъни ашагъа ташлачы. Алланынъ Китабында язылгъан ки, О, Сенинъ акъкъынъда Озь мелеклерине эмир этер, ве олар Сени къолларында котерип кетерлер, аякъларынъ ташкъа сюрюнмез.

7 ^gИса онъа:

– Анда даа язылгъан: Раббинъни, сенинъ Алланъны сынама, – деди.

8 Сонъ Шейтан Исаны пек юксек къая устюне чыкъартты. Дюньянынъ бутюн падишалыкъларыны ве оларнынъ шуретини Онъа косьтерип:

9 – Эгер тиз чёкип, манъа ибадет этсенъ, Санъа буларнынъ эписини берерим, – деди. 10 ^hИса исе деди:

– Козюмден ёкъ ол, Шейтан! Алланынъ Китабында бойле язылгъан: Раббинъе Алланъа белинъни бук, тек Онъа ибадет эт.

11 ⁱБундан сонъ Шейтан Исадан кетти. Шу ань мелеклер келип, Онъа хызмет эттилер.