Num 28:1-15 | CrhCTB | STEP | РАББИ Мусагъа бойле деди:

‏ Numbers 28:1-15

Эр вакъыттаки къурбанлар акъкъында

1 РАББИ Мусагъа бойле деди:

2 ^a– Исраиль огъулларына бойле буюр, оларгъа бойле айт:

Мукъайт олунъыз ве Меним бахшышларымны, Манъа хош къокъу чыкъармакъ ичюн атеште якъыладжакъ бахшыш оларакъ кетирген ашлыкъ бахшышларымны озь вакътында кетиринъиз.

3 Оларгъа айт:

Атеште якъыладжакъ бахшыш оларакъ РАББИге шуны кетиринъиз: эки баш бир йыллыкъ къусурсыз къочкъарны. Оларны эр вакъыт бутюнлей якъыладжакъ къурбан оларакъ кетиринъиз. 4 Къочкъарнынъ бирини саба, экинджисини акъшам кетиринъиз. 5 Ашлыкъ бахшышы оларакъ ярым чанакъ темиз зейтюн ягъынен къарыштырылгъан бир чанакъ ^{▼▼Ярым чанакъ; бир чанакъ – къ. еуд. «хиннинъ дёртте бир пайы», «(эфанынъ) онда бир пайы».} энъ яхшы богъдай унуны кетиринъиз. 6 Бу – даимий бутюнлей якъыладжакъ бахшыштыр. О, Синай дагъында буюрылгъан эди, хош къокъу чыкъармакъ ичюн, РАББИге атеште якъыладжакъ къурбандыр. 7 Эр бир къочкъарнен ярым чанакъ ольчюсинде тёкюледжек бахшышны кетиринъиз. Азиз ерде тёкюледжек бахшыш оларакъ РАББИ ичюн ичкини тёкюнъиз. 8 Экинджи къочкъарны, сабадаки киби, ашлыкъ бахшышынен ве тёкюледжек бахшышнен берабер атеште якъыладжакъ къурбан оларакъ акъшам кетиринъиз. О, РАББИге хош къокъу олсун.

Раатлыкъ куню кетирильген бахшышлар

9 Раатлыкъ куню эки баш бир йыллыкъ къусурсыз къочкъарны, ашлыкъ бахшышы оларакъ зейтюн ягъынен къарыштырылгъан эки чанакъ энъ яхшы богъдай унуны ве тёкюледжек бахшышны кетиринъиз. 10 ^cЭр вакъыттаки бутюнлей якъыладжакъ къурбандан ве тёкюледжек бахшыштан гъайры, эр раатлыкъ куню бойле бутюнлей якъыладжакъ къурбанны кетиринъиз.

Янъы ай догъгъанда кетирильген бахшышлар

11 ^dЭр янъы айнынъ биринджи куню РАББИге бутюнлей якъыладжакъ къурбан оларакъ туварынъыздан эки бузавны, бир къочкъарны ве еди баш бир йыллыкъ къусурсыз къозуны кетиринъиз. 12 Эр бузавнен берабер ашлыкъ бахшышы оларакъ зейтюн ягъынен къарыштырылгъан учь чанакъ энъ яхшы богъдай уну, къочкъарнен берабер ашлыкъ бахшышы оларакъ зейтюн ягъынен къарыштырылгъан эки чанакъ энъ яхшы богъдай уну, 13 эр къозунен берабер ашлыкъ бахшышы оларакъ зейтюн ягъынен къарыштырлгъан бир чанакъ ^{▼▼Учь чанакъ; эки чанакъ; бир чанакъ – къ. еуд. «(эфанынъ) онда учь пайы», «(эфанынъ) онда эки пайы», «(эфанынъ) онда бир пайы».} энъ яхшы богъдай унуны кетиринъиз. Бу – РАББИ ичюн бутюнлей якъыладжакъ къурбандыр ве хош къокъудыр. 14 Эр бузавнен берабер тёкюледжек бахшыш оларакъ бир чанакъ, къочкъарнен берабер – чанакънынъ учьте экиси, эр къозунен берабер – ярым чанакъ ^{▼▼Бир чанакъ; чанакънынъ учьте экиси; ярым чанакъ – къ. еуд. «ярым хин», «хиннинъ учьте бир пайы», «хиннинъ дёртте бир пайы».} шарап олсун. Йылларнынъ айларында эр янъы ай куню бойле бутюнлей якъыладжакъ къурбанлар кетирильсин.

15 Эр вакъыттаки бутюнлей якъыладжакъ къурбандан ве тёкюледжек бахшыштан гъайры, РАББИге гуналар ичюн къурбан оларакъ бир текени кетиринъиз.