Numbers 28:16-31
Песах Байрамында кетирильген бахшышлар
16 aБиринджи айда, айнынъ 14-юнджи куню – РАББИнинъ Песахыдыр. 17 bШу айнынъ 15-инджи куню байрам олсун. Еди кунь маясыз пишкен пите ашанъыз. 18Биринджи куню мукъаддес топлашув олсун, ишке янашманъыз. 19РАББИ ичюн атеште бутюнлей якъыладжакъ къурбан оларакъ тувардан эки бузав, бир къочкъар ве бир йыллыкъ еди къозуны кетиринъиз. Оларнынъ эписи къусурсыз олмакъ керек. 20Оларнен берабер ашлыкъ бахшышы оларакъ зейтюн ягъынен къарыштырылгъан энъ яхшы богъдай унуны кетиринъиз: эр бузавнен берабер – учь чанакъ, къочкъарнен берабер – эки чанакъ, 21еди къозудан эр къозунен берабер – бир чанакъ. 22Гуналар ичюн къурбан оларакъ, сиз ичюн одеме этмеге, бир теке кетиринъиз. 23Сабадаки бутюнлей якъыладжакъ къурбандан, эр вакъыттаки бутюнлей якъыладжакъ къурбандан гъайры шу къурбанларны кетиринъиз. 24Бойледже, еди кунь девамында атеште якъыладжакъ аш кетиринъиз. О, РАББИге хош къокъу олсун. Буны эр вакъыттаки бутюнлей якъыладжакъ къурбандан ве тёкюледжек бахшыштан гъайры япынъыз. 25Единджи куню мукъаддес топлашувынъыз олсун, ишке янашманъыз.Биринджи Берекетлер Куню кетирильген бахшышлар
26Биринджи Берекетлер Куню, Афталар Байрамында РАББИге янъы ашлыкъ бахшышларыны кетиргенинъизде, мукъаддес топлашувынъыз олсун, ишке янашманъыз. 27РАББИ ичюн хош къокъу оларакъ, бутюнлей якъыладжакъ къурбан оларакъ тувардан эки бузав, бир къочкъар ве бир йыллыкъ еди къозуны кетиринъиз. 28Оларнен берабер ашлыкъ бахшышы оларакъ зейтюн ягъынен къарыштырылгъан энъ яхшы богъдай унуны кетиринъиз: эр бузавнен берабер – учь чанакъ, къочкъарнен берабер – эки чанакъ, 29еди къозудан эр къозунен берабер – бир чанакъ. 30Сиз ичюн одеме этмеге бир текени кетиринъиз. 31Эр вакъыттаки бутюнлей якъыладжакъ къурбандан ве ашлыкъ бахшышындан гъайры, буларны тёкюледжек бахшышнен берабер кетиринъиз. Олар къусурсыз олмакъ керек.
Copyright information for
CrhCTB