‏ 1 Corinthians 10

İzrail bizä örnek

1Kardaşlar, istämeerim, habersiz kalasınız, ani hepsi bobalarımız bulut altında bulundular, da hepsi deniz içindän geçtilär.

2Hepsi bulutta hem denizdä vaatiz oldular, ki baalaşsınnar Moiseylän.

3Hepsi idi bir imektän, verili Ayoz Duhtan.

4Hepsi içti bir sudan, verili Ayoz Duhtan, zerä içtilär bir duhça Kanaradan, ani ardlarından gelärdi, o Kanara – Hristos.

5Hep okadar taa çoyunu onnardan Allah beenmedi, çünkü çolda kaybeldilär.

6Onnarlan bunnar hepsi oldu, ki bizä örnek olsunnar, ki istämeyelim kötülük yapmaa, onnar gibi.

7Baş iiltmeyin idollara, onnardan kimi gibi, nicä yazılı: «İnsan oturdu imää hem içmää, sora, kalkıp, oynayıp, sefalanmaa başladı».

8Orospulaa düşmeyelim, nicä onnardan kimi düştü, da bir gündä irmi üç bini erä serildi.

9Denämeyelim Saabiyi, nicä onnardan kimisi denedi da yılannardan öldürüldülär.

10Mırıldamayın, nicä onnardan kimi mırıldadı da telef oldular ölüm angilindän.

11Bunnar onnarlan oldu, ki bizä örnek olsun, bizim için yazıldı, ki akıl üürenelim biz, kim etişti bitki vakıtlara.

12Butakım, kim sanêr, ani ayakça durêr, baksın düşmesin.

13Sizä geldi denemeklär, hep ölä, nicä herkezinä geler. Allah inanç da kolvermäz, ki kuvedinizdän zeedä denenmiş olasınız. O denemäk vakıdı hazırlayacek sizä bir çıkış yolu, ki dayanabiläsiniz.

İdollar hem komka

14Onuştan, sevgili kardaşlarım, sakının idollara baş iiltmektän.

15Lafederim, nicä akıllı insannara, siz kendiniz düşünün, ne söleerim.

16İisözlenmiş çölmek, angısını iisözleeriz, diil mi paydaşlık Hristozun kanından? Ekmek, angısını kırêrız, diil mi paydaşlık Hristozun güüdesindän?

17Çünkü bir ekmek, biz dä çokluk bir güüdeyiz, zerä hepsimiz paydaşız bir ekmektän.

18Bakın onnara, kim tencesinä İzrail senselesindän. Onnar, kim kurbannardan pay alêr, paydaş olmêêr mı kurbannıktan da?

19Ne isteerim sölemää? Kurbanın, idola baaşlanmış, saygılıı var mı? Yada idolun var mı saygılıı?

20Olmaz! Bunu deerim: çünkü tayfännar kurbannarını baaşlêêr fena duhlara, ama diil Allaha. Bän istämeerim, ki siz paydaş olasınız fena duhlarlan.

21Yok nasıl içäsiniz hem Saabinin çölmeendän, hem fena duhların çölmeendän. Yok nasıl paydaş olasınız hem Saabinin sofrasından, hem dä fena duhların sofrasından.

22Neçin isteeriz Saabiyi gücendirmää? Ne, biz Saabidän taa kaaviyiz mi?

Hepsini yapın Allahın metinnii için

23«Hepsini düşer yapayım», – deersiniz, ama hepsi faydalı olmaz. «Hepsini düşer yapayım», – deersiniz, ama hepsi duhça kaavilemäz.

24Kimsey bakmasın sade kendi faydasını, ama herkezi baksın başkasının da faydasını.

25İyin herbir yaanıdan, ani panayırda satılêr, hiç soruşturmayarak, ki üzünüz pak olsun.

26Zerä «bütün er hem ne er üstündä – hepsi Saabinindir».

27Eer inansızlardan biri sizi sofraya teklif edärseydi, da siz gitmää kayıl olursaydınız, iyin, ne önünüzä koyaceklar, hiç soruşturmayarak, ki üzünüz pak olsun.

28Ama eer birkimsey deyärseydi: «Bu yaanı idola baaşlanmış», ozaman imeyin söleyenin hatırı için, ki üzünüz pak olsun /Zerä er hem ne var er üstündä – hepsi Saabinindir/.

29Lafederim, diil ani sizin üzünüz pak olsun, ama onun üzü pak olsun. Zerä neçin benim serbestliim sıkılansın başkasının üzü için?

30Eer bän, şükür edip, iyärseydim, nedän beni maanalasınnar imäk için, angısı için şükür ederim?

31Ölä ki, hepsi, ne iyersiniz hem içersiniz, hem hepsi, ne yapêrsınız, hepsini yapın Allahın metinnii için.

32Olmayın köstek ne iudeylerä, ne urumnara, ne dä Allahın klisesinä.

33Bän bakêrım her taraftan beendireyim kendimi herkezinä, zerä bakmêêrım kendi faydamı, ama çokluun faydasını, ki onnar kurtulsunnar.