‏ 1 Corinthians 12

Duhun baaşışları

1Kardaşlar, istämeerim, habersiz kalasınız Duhun baaşışlarından.

2Bilersiniz, açan siz taa tayfändınız, yolu şaşırıp, baş iildärdiniz dilsiz idollara.

3Onuştan isteerim, annayasınız, ani kimsey, kim Allahın Duhunnan lafeder, yok nasıl betvalasın İisusu, hem kimsey deyämäz Ona «Saabi İisus», salt Ayoz Duh.

4Var çok türlü baaşışlar, ama hepsi bir Duhtan.

5Var çok türlü izmetlär, ama salt bir Saabi.

6Var çok türlü işlemeklär, ama Allah bir, Kim herkezdä hepsini yapêr.

7Herkezä veriler baaşış, angısından Ayoz Duh açılêr, ki fayda getirsin.

8Birisinä Duhlan veriler, aarifçesinä lafetsin, başkasına veriler, bilgili lafetsin hep o Duhlan.

9Hep o Duhtan birisinä veriler inan, başkasına hep o Duhtan beceriklik hastaları alıştırmaa.

10Taa başkasına veriler kuvet, ki yapsın kudretli işlär, başkasına – prorokluk etsin, başkasına – duhları tanısın, başkasına hertürlü dillär veriler, başkasına beceriklik, dilleri çevirsin.

11Hepsi bunnarı yapêr bir Duh, Angısı herkezinä payeder, nicä Kendi isteer.

Güüdenin birlii

12Nicä güüdä bir, ama ekleri çok, da çok eklerdän bir güüdä kurulu, hep ölä Hristozda da.

13Hepsimiz vaatiz olduk bir Duhlan, ki bir güüdä olalım, olsun iudey, olsun urum, olsun çırak, olsun serbest, hepsimiz bir Duhtan sulanmışız.

14Zerä güüdä diil bir ektän, ama toplu çok ektän.

15Eer ayak deyärseydi: «Çünkü diilim el, diilim güüdedän», ne, bu beterä olmaz mı güüdedän?

16Eer kulak deyärseydi: «Çünkü diilim göz, diilim güüdedän», ne, bu beterä olmaz mı güüdedän?

17Eer bütün güüdä olaydı sade göz, ne olaceydı işitmäklän? Eer bütün güüdä olaydı salt kulak, ne olaceydı koku duygusunnan?

18Ama Allah erleştirdi herbir eki güüdedä ölä, nicä Kendi istedi.

19Eer hepsi bir ek olaydı, ozaman ne olaceydı güüdeylän?

20Dooru, ani ek çok, ama güüdä bir.

21Göz yok nasıl desin elä: «Sän diil lääzımsın bana». Hep ölä baş yok nasıl desin ayaklara: «Yok lääzımnıım sizin için».

22Buna karşı, güüdenin ekleri, ani görüner taa yufka, mutlak bizä lääzım.

23Hem güüdenin eklerinä, angılarını taa ayıp sayêrız, taa çok ikram vereriz, da eklerimizä, ani diil gözäl, maasuz kahır güderiz.

24Gözäl eklerin yok lääzımnıkları donaklık için. Ama Allah ölä güüdeyi yaptı, ki taa çok hatır verilsin o eklerä, angıları taa az ikramda,

25ki güüdedä ayırıklık olmasın, ama eklär birtürlü zaamet gütsünnär biri-birileri için.

26Eer zeetlenärseydi bir ek, hepsi eklär onunnan barabar zeetlenerlär. Eer bir ek ikramnanarsaydı, hepsi eklär onunnan barabar sevinerlär.

27Siz Hristozun güüdesi, hem ayırı-ayırı bu güüdenin ekleriysiniz.

28Allah erleştirdi klisedä ilkin apostolları, ikinci – prorokları, üçüncü – üüredicileri, sora onnarı, kim kudretli işlär yapêr; sora onnarı, kimin baaşışı var hastaları alıştırmaa; onnarı, kim yardım eder; onnarı, kim kullanêr; onnarı, kim lafeder hertürlü dillerdä.

29Ne, hepsi mi apostol? Hepsi mi prorok? Hepsi mi üüredici? Hepsi mi yapabiler kudretli işlär?

30Hepsi mi hastaları alıştırabiler? Hepsi mi lafedäbiler başka dillerdä? Hepsi mi dilleri çeviräbiler?

31Çalışın taa üstün baaşışları kabletmää. Da bän gösterecäm sizä en ii yolu.