1Cor 13 | GagNTL | STEP | Eer lafedärseydim insan dilindä yada angil dilindä, ama sevgim yoksaydı, bir ötär bakırım eki bir uuldar kimvalım.

‏ 1 Corinthians 13

Sevgi

1 Eer lafedärseydim insan dilindä yada angil dilindä, ama sevgim yoksaydı, bir ötär bakırım eki bir uuldar kimvalım.

2 Eer bendä varsaydı prorokluk beceriklii, eer bilirseydim hepsi saklı işleri hem edendiseydim bütün bilgiçlii, eer varsaydı büük inanım, bayırları da erindän diiştireyim, ama yoksaydı sevgim, ozaman bän bişey diilim.

3 Eer bütün varlıımı baaşlarsaydım, ki doyurayım fukaaraları, eer güüdemi ateşä verirseydim ^{▼▼Ateşä verirseydim: bir çok eski teksttä «verirseydim üüneyim deyni».}, ama sevgim yoksaydı, bana bundan hiç bir fayda olmaz.

4 Sevgi çok dayanar, iilik yapar, sevgi kıskanmar, üünmär, kabarmar.

5 Sevgi kötü kendini götürmär, aaramar fayda kendisinä, tez üfkelenmär, küsü tutmar,

6 kötülää sevinmär, ama aslılaa sevinir.

7 Sevgi hepsini örter, hepsini inanêr, hepsinä umut eder, hepsinä dayanêr.

8 Sevgi hiç durgunmar. Prorokluk sona gelecek, dillär susacek, bilgiçlik kaybelecek,

9 zerä bizim bilgiçlik kederli, bizim prorokluk diil taman.

10 Ama açan tamannık gelecek, ozaman hepsi, ne kederli, yok olacek.

11 Uşakkan, bän uşakçasına lafedärdim, uşakçasına düşünärdim. Ama olgunnandıynan, uşak işlerindän brakıldım.

12 Şindi hepsini, nicä bir dumannı şişedän göreriz, ama ozaman görüşecez üz-be-üz. Şindi benim bilgiçliim kederli, ama ozaman Allahı tanıyacam ölä, nicä bän tanınmışım.

13 Şindi kalêr bunnar üçü: inan, umut hem sevgi, ama sevgi onnardan taa büük.