‏ 1 Corinthians 16

Kardaşlara yardım

1Dönelim yardıma, ne toplanacek Allahın ayoz insanı için. Siz yapın ölä, nicä sıraladım Galatiya kliselerindä.

2Herkeziniz haftanın ilk günü ▼

▼Haftanın ilk günü – pazar günü.

koysun bir tarafa kendi gelirindän, nekadar kolaylıı var, da korusun, ki bän geldiynän, olmasın yardım toplanması.

3Açan gelecäm, kimi seçeceniz, onnarı kiyatlarlan yollayacam, götürsünnär sizin baaşışlarınızı İerusalimä.

4Eer uygun olursa, ki bän dä gideyim, ozaman benimnän gelirlär.

Pavlinin maasuz istedikleri

5Sizä gelecäm, açan Makedoniyadan geçecäm, zerä bän geçerim Makedoniyadan.

6Beki sizdä bir vakıt kalacam, beki dä kışlayacam, eer siz beni geçirärseniz, nereyi gidecäm.

7Zerä bän istämeerim görüşeyim sizinnän salt geçeräk, ama umutlanêrım sizdä kalayım bir parça vakıt, eer Saabi izin verirsä.

8Efes kasabasında duracam Ellinci günü yortusunadan,

9zerä bana açıldı bir geniş kapu büük işlär için, ama karşı durannar da çok.

10Eer gelärseydi sizä Timofey, bakın, o korkusuz olsun aranızda. Zerä o yapêr Saabinin işini, nicä dä bän.

11Onuştan kimsey onu paasızlandırmasın, ama geçirin onu usluluklan, ki gelsin bana, zerä bän bekleerim onu kardaşlarlan.

12Kardaş Apollosa çok yalvardım, ki gitsin kardaşlarlan sizä, ama o hiç istämedi şindi gitsin. O gidecek, nezaman vakıdı uyacek.

13Kuşku olun, inanda kaavi durun, girgin hem kuvetli olun.

14Hepsini sevgiylän yapın.

15Yalvarêrım sizä, kardaşlar, – siz bilersiniz Stefanın evdekilerini, onnar Ahayada ilk inancılar da verildilär, ki Allahın ayoz halkına izmet etsinnär –

16butürlü insannarı sesleyin hem hepsini, kim onnarlan işleer hem çalışêr.

17Bän sevindim, açan Stefan, Fortunat hem Ahaik geldilär. Onnar bana unutturdular sizinnän olmamazlıımı,

18zerä onnar beni dä, sizi dä duhça serinnettilär. Onuştan busoy insannarı paaya koyun.

19Selämneerlär sizi Asiya dolayında kliselär. Sizä çok seläm yollêêrlar Akila hem Priskilla kliseylän bilä, ani onnarın evindä.

20Hepsi kardaşlar seläm sizä yollêêrlar. Selämneyin biri-birinizi ayoz öpüşlän.

21Bän, Pavli, bu selämneri yazêrım kendi elimnän.

22Eer birkimsey sevmärseydi Saabi İisus Hristozu, olsun betvalı. Marana fa ▼

▼Marana fa – arameycä laf, annaması «Saabimiz, gel!»

!

23Saabi İisusun iivergisi olsun sizinnän.

24Benim sevgiliim İisus Hristozda sizinnän hepsinizlän. /Amin./