1Cor 5 | GagNTL | STEP | Aslısını söleerlär, ani aranızda orospuluk varmış, hem ölä bir orospuluk, ani tayfännarda da olmêêr. Orayı kadar etişti, ani sizdän birisi yaşêêr kendi bobasının karısınnan.

‏ 1 Corinthians 5

Orospuluk yapan kardaş

1 Aslısını söleerlär, ani aranızda orospuluk varmış, hem ölä bir orospuluk, ani tayfännarda da olmêêr. Orayı kadar etişti, ani sizdän birisi yaşêêr kendi bobasının karısınnan.

2 Siz dä bununnan şişkinnenersiniz! Taa ii olaceydı, ki aalayasınız. O, kim bu işi yaptı, düşer uuradılsın aranızdan, ölä diil mi?

3 Makar ki bulunmêêrım güüdeylän aranızda, ama olup duhlan, kararladım, sansın aranızda bulunêrım, ani kim yaptı bunu,

4 toplanmakta, İisusun adına, hem benim duhum da olsun sizinnän, Saabimiz İisusun kuvedinnän,

5 verin onu şeytanın elinä, ki teni telef olsun, ama duhu kurtulsun Saabi İisusun gelmesindä.

Hristos – Paskellä kuzusu

6 Üünmeniz diil ii. Bilmeersiniz mi, ani az maya bütün hamuru kabardêr?

7 Paklanın eski mayadan, ki olasınız bir eni hamur, nicä dä mayasızsınız. Zerä Hristos, bizim Paskellä kuzumuz, kurban oldu.

8 Geçirelim yortuyu diil eski hamurlan hem diil kin hem kötülük mayasınnan, ama halizliin hem aslılıın mayasız ekmäännän.

9 Sizä yazdım benim kiyadımda, kafadar olmayasınız orospuluk yapannarlan.

10 Doorusunu, ne demäk istärdim, diil, ki kafadar olmayasınız bu dünneyin adamnarınnan, kim orospuluk yapar, tamahlık edär, soygunculuk edär yada idollara baş iildär. Zerä ozaman lääzım çıkasınız bu dünnedän!

11 Ama yazdım, kafadar olmayasınız birisinnän, kim kendini «kardaş» sayêr, ama kendi bir orospu, tamah, idollara baş iildän, amazçı, içkici yada bir hırsız. Butürlü adamnarlan düşmeer sofraya da oturasınız.

12 Hakına, ne işim benim, maanalayım dışankıları? Düşmeer mi, daava kesäsiniz klisedä olannara?

13 O dışankı olannarı Allah daava edecek. «Aranızdan uuradın bu kötü adamı».