1Cor 6 | GagNTL | STEP | Nasıl kıyışêr sizdän birisi başkasına daava açmaa, da daava kesmää gider inansızlara , ama gitmeer Allahın ayoz halkına?

‏ 1 Corinthians 6

Hristiannarda daavalar

1 Nasıl kıyışêr sizdän birisi başkasına daava açmaa, da daava kesmää gider inansızlara ^{▼▼İnansızlara – urumca «diil doorulara».}, ama gitmeer Allahın ayoz halkına?

2 Bilmeersiniz mi, ani Allahın ayoz halkı daava kesecek bu dünneyä? Eer dünneyä daava kesärseydiniz, küçük işlerdä daava kesämärsiniz mi?

3 Bilmeersiniz mi, ani biz daava kesecez angillerä? Nekadar taa çok daava kesäbiliriz bu zamanın işlerindä!

4 Açan var bir daavanız bu yaşamaktakı işlär için, siz daavacı koyêrsınız onnarı, kim klisedä bişey diil.

5 Bunnarı söleerim sizin utanmanız için. Ne, sizin aranızda bir dä aarif adam yok mu, ki çözdürsün kardaşlar arasında daavaları?

6 Kardaş kardaşınnan daavaya çıkêr, da bunu inansızların önündä yapêr!

7 Siz biri-birinizi daavaya verärseniz, bu – sizin için bir aşaalanmaktır. Taa ii diil mi, zarara dayanasınız? Taa ii diil mi, kaybedäsiniz?

8 Ama siz kendiniz zarar yapêrsınız hem kendi kardaşlarınızı da soyêrsınız.

9 Bilmeersiniz mi, ani o dooru olmayannar Gök Padişahlıını miras etmeyeceklär. Aldanmayın, hayırsızlık yapannar, idollara baş iildennär, orospuluk yapannar, gomoseksualistlär ^{▼▼«Gomoseksualistlär» iki urumca laftan çevirili.},

10 hırsızlar, tamahlar, içkicilär, amazçılar, soyguncular Gök Padişahlıını miras etmezlär.

11 Butürlüydü kiminiz sizdän, ama yıkandınız, ayozlandınız, aklandınız Saabi İisus Hristozun adınnan hem bizim Allahın Duhunnan.

Orospuluktan korunun

12 «Hepsini düşer yapayım», – deersiniz, salt diil hepsi faydalı. «Hepsini düşer yapayım», – deersiniz, ama bişey brakmam beni zaplasın.

13 «İmäk şkembä için, şkembä dä imäk için», – deersiniz. Ama Allah telef edecek ikisini dä. Güüdä diil orospuluk için, ama Saabi için, Saabi dä güüdä için.

14 Allah, Kim diriltti Saabiyi, dirildecek bizi dä Kendi kuvedinnän.

15 Bilmeersiniz mi, ani sizin güüdeleriniz – Hristozun ekleri? Ne, Hristozun eklerini alıp, yapayım onnarı orospuluk ekleri mi? Olmaz!

16 Ne, bilmeersiniz mi? Kim birleşer orospuylan, bir güüdä olêr onunnan. Nicä dä sölener: «Onnar ikisi bir güüdä olêrlar».

17 Ama kim birleşer Saabiylän, Onunnan bir duh olêr.

18 Korunun orospuluktan. Kalan günahlar, ani insannar yapêr, güüdedän dışarı, ama orospu kendi güüdesinä karşı günah yapêr.

19 Ne, bilmeersiniz mi, ani güüdeniz – Duhun ayoz binası, neredä Ayoz Duh bulunêr, hem Onu Allahtan kablettiniz? Siz kendi-kendinizin diilsiniz.

20 Zerä siz satın alınmışsınız bir büük paaylan. Onuştan metinneyin Allahı sizin güüdenizlän /hem duhunuzlan, ani Allahtan kablettiniz/.