‏ 1 Thessalonians 5

1Kardaşlar, bu oluşlar için yok zorluk yazmaa sizä, ne vakıt hem ne günnerdä olacek,

2zerä kendiniz ii bilersiniz, ani Saabinin günü gelecek, nicä bir hırsız gecä geler.

3Ozaman, açan deyeceklär «usluluk hem korkusuzluk», ozaman ap-ansızdan bela üstlerinä gelecek, nicä karının duumak sancıları, da kurtulamayaceklar.

4Ama siz, kardaşlar, diilsiniz karannıkta, ki o gün tutsun sizi hırsız gibi.

5Zerä siz hepsiniz aydınnık oolları, gündüz oolları, diiliz ne gecä, ne dä karannık uşakları.

6Onuştan uyumayalım, nicä kalanı, ama ayık hem uyanık olalım.

7Çünkü uyuyannar gecä uyuyêrlar, içkicilär dä gecä sarfoş olêrlar.

8Ama biz gündüz oolları, onuştan lääzım ayık olalım, güüsümüzä inan hem sevgi zirhini giiyelim, başımıza kurtulmak umut başlıını takalım.

9Çünkü Allah bizi üfkesi için ayırmadı, ama kurtulmak edenelim bizim Saabi İisus Hristos adından,

10Angısı öldü bizim için, ki biz uyanıkız mı, uyuyêrız mı, yaşayalım Onunnan bilä.

11Onuştan biri-birinizi üreklendirin hem duhça kaavileyin, nicä dä yapêrsınız.

Bitki nasaatlar hem selämnär

12Yalvarêrız sizä, kardaşlar, hatırlayın sizdeki işçileri, ani sizi kullanêrlar Saabinin yolunda hem akıl vererlär.

13Onnara en büük saygı hem sevgi gösterin onnarın işi için. Biri-birinizlän barışmakta yaşayın.

14Sizä yalvarêrız, kardaşlar, akıl verin kasavetsizlerä, üreklendirin korkakları, yufkaları arkalayın, hepsinnän saburlu olun.

15Bakın, ki kimsey kötülük için kötülük çevirmesin, ama çalışın herzaman iilik yapmaa biri-birinizä hem herkezinä.

16Herzaman sevinin.

17Dayma dua edin.

18Herbir halda şükür edin, zerä ölädir sizin için Allahın istedii İisus Hristozda.

19Ayoz Duhu süündürmeyin.

20Prorokluu paasızlandırmayın.

21Hepsini deneyin, ne ii, ondan tutunun.

22Yıraklanın hertürlü kötülüktän.

23Usluluk verän Allah bütünnä sizi ayozlasın. Sizin duhunuz, canınız hem güüdeniz bütünnä kedersiz korunsun bizim Saabi İisus Hristozun gelmesindä.

24Sizi çaaran Allah inançtır, O bunnarı yapar.

25Kardaşlar! Dua edin bizim için.

26Selämneyin hepsi kardaşları ayoz öpüşlän.

27Saabinin adınnan sımarlêêrım, okuyun bu kiyadı hepsi /ayoz/ kardaşlara.

28İivergi olsun sizinnän bizim Saabi İisus Hristozdan. /Amin./