1Ti 5 | GagNTL | STEP | İhtärı sert azarlama, ama nasaat ver ona, nicä bobana. Nasaat ver genç adamnara, nicä kardaşlarına;

‏ 1 Timothy 5

Baalantılar klisedä

1 İhtärı ^{▼▼İhtär – yada «presviter».} sert azarlama, ama nasaat ver ona, nicä bobana. Nasaat ver genç adamnara, nicä kardaşlarına;

2 ihtär karılara, nicä anana; genç karılara, nicä kızkardaşlarına, bütün paklıklan.

3 Hatır güt dul karılara, ani hakına kimseysiz.

4 Ama eer bir dul karının varsa uşakları eki unukaları, onnar üürensinnär Allahın yolunda gitmää, ilkin kendi aylesinä yardım etsinnär, iilik çevirsinnär ana-bobalarına, zerä bunu Allah beener.

5 Dul karı, ani hakına kimseysiz hem yalnız kalmış, umudunu Allaha koyêr hem gecä-gündüz durmamayca Ona yalvarêr hem dua eder.

6 Ama dul karı, ani kendini verer sefalık sürmeyä, taa yaşarkan, ölüdür.

7 Bu işleri onnara annat, ki maanasız tabeetli olsunnar.

8 Eer birkimsey kendi yakınnarı için, maasuz kendi aylesi için zaamet gütmärseydi, o inanı inkär etmiş da taa beterdir, nekadar bir inansız.

9 Ki adı dullar listasına yazılsın, dul karı lääzım olsun altmış yaşından yukarı, bir kocaylan evlenmiş,

10 ii işleri için bilinän, uşak büütmüş, musaafir kabletmiş, Allahın ayoz halkının ayaklarını yıkamış ^{▼▼Ayak yıkamaa – musaafirciliin nışanıydı.}, sıkıntıda olannara yardım etmiş hem çalışkannıklan hertürlü iilik yapmış.

11 Taa genç dulların adlarını listaya yazma. Zerä onnar, tencä istedikleri kaaviledip Hristoza karşı, enidän evlenmää isteerlär.

12 Ozaman kabaatlı kalêrlar, zerä bozêrlar eminnerini, ani ilkin yaptılar.

13 Ondan kaarä, onnar üürenerlär haylak gezmää evdän evä, da diil sade haylak gezmää, ama çeneli olmaa hem başkaların işlerinä karışmaa, söleyeräk, ne düşmeer.

14 Onuştan isteerim, ki genç dullar evlensinnär, uşak duudursunnar, evlerini kullansınnar da karşı durana kolaylık vermesinnär, ki bizi kötülesin.

15 Zerä kimisi onnardan şindän sora saptılar da şeytanın ardına gittilär.

16 Eer bir inancı karının dul yakınnarı varsa, lääzım onnara baksın da zaametä koymasın kliseyi, ki klisä yardım edäbilsin dullara, ani hakına kimseysiz.

17 Presviterlär, ani ii önderleerlär, lääzım iki katına hatırlansınnar, ayırıca onnar, kim işleer nasaat etmektä hem üüretmektä.

18 Zerä Ayoz Yazı deer: «Baalama öküzün aazını, harman düüyärkän» hem «İşçiyä yaraşêr kendi ödää».

19 Kabaatlandırmak presviterä karşı kabletmä, olmayınca iki-üç şaat.

20 Kim ileri dooru günah yapêr, onnarı takazala hepsinin önündä, ki kalanı da korksun.

21 Allahın, İisus Hristozun hem seçilmiş angillerin önündä seni eminneerim, ki pay tutmayarak hem kimseyin üzünä bakmayarak bu sımarlamakları tamannayasın.

22 Ellerini kimseyin üstünä tez koyma, pay alma başkaların günahlarında. Kendini pak tut.

23 İleri dooru içmä salt su, ama iç biraz şarap senin katının hem sık hastalıkların beterinä.

24 Kimi insannarın günahları açık, onnar öncä, daava olmadaan, biliner. Başkaların günahları sora açılêr.

25 Hep ölä ii işlär dä açık, onnar da, ani diil açık, yok nasıl saklı kalsın.